Забур жырлары 89

¹Зор рақым-шапағатыңды, уа, Жаратқан, Әр уақытта мен ән-жырға қосамын, Сөзіңе беріктігіңді Өзіңнің Бар ұрпақтарға айтатын боламын.

²Солай Сені�� тұрақты рақымыңның Мәңгілік екенін жариялаймын. Өзіңнің шындығыңды көкте бекіттің, (Өйткені Сен мынаны айтқан едің:)

³«Мен таңдаулыммен Келісім жасадым, Қызметшім Дәуітке былай деп ант бердім:

⁴Әулетіңді әрқашан да нығайтамын, Ұрпақтан ұрпаққа тағыңды орнатамын».

⁵Уа, Жаратқан, көкте даңқталар кереметтерің, Қасиеттілер жиынында — өз беріктігің.

⁶Көктегі кім Иемізбен теңесе алар, Күштілер арасында кім Жаратқанға ұқсар?

⁷Қасиетті періштелердің үлкен тобы Терең қастерлейді айбынды Құдайды, Биік тағын айналдыра Оны құрметтейді.

⁸Уа, Жаратушы Құдай, Әлемнің Иесі, Саған ұқсас кім бар, сондай құдіретті? Адалдығың жан-жақтан қоршайды Сені.

⁹Уа, Ием, буырқанған теңізге билік айтасың, Көтерілген толқындарын тыншытасың.

¹⁰Паң мысырлықты Сен талқандап қираттың, Жауларыңды күшті қолыңмен шашыраттың.

¹¹Көк те — Сенікі, жер де — өз меншігің, Негізін салдың Сен күллі әлемнің, Әрі жараттың ондағылардың бәрін.

¹²Сен жараттың солтүстік, оңтүстікті де, Табор, Хермон таулары қуанады есіміңе.

¹³Қолың мен білегің ерен қуатты, Оң қолың барлығынан да жоғары.

¹⁴Әділдік, әділет — тағыңның негізі, Рақым мен адалдық алдыңда жүреді.

¹⁵Мадақтау жиналысына шақырған Қуанышты дауысты танып, қосылған Халық сондай бақытты, өйткені оған Жүзіңнің нұрында жүру бұйырылған,

¹⁶Күні бойы олар ұлы атыңа қуанады, Әділдігің оларды жоғарылатады.

¹⁷Бұлардың күші мен ұлылығы Өзіңнен, Сенің рақымыңмен патшамыз күшейген.

¹⁸Себебі қорғанышымыз — Жаратқан Иеден, Біздің патшамыз — Исраилдің киелі Тәңірінен.

¹⁹Уа, Жаратқан, бірде Сен аян берген едің, Адал кісіңе мынадай сөз айтқан едің: «Мен жауынгер адамға күш-қуат дарыттым, Халықтан оны таңдап ап, жоғарылаттым:

²⁰Осы қызметшім Дәуітті тауып алдым, Арнайы майымды оған жақтырттым, Патша болуға оны тағайындаттым.

²¹Ұдайы оны қорғап-қолдайтын боламын, Әрдайым күш-қуат сыйлайтын боламын.

²²Жау одан амалын асыра алмайды, Зұлымдар тықсырып, жеңе алмайды,

²³Оның алдынан жауларын құртамын, Өзін жек көргендерді қиратамын.

²⁴Берік рақымыма Дәуіт ие болады, Өз атыма бола оның күші артады,

²⁵Дәуіттің билігін Жерорта теңізіне Создырам, әрі шығыстың өзендеріне.

²⁶Ол былай деп атамақ атымды Менің: «Сен Әкемсің, Құдайымсың өзімнің, Жартастай паналайтын Құтқарушымсың».

²⁷Мен оны «Тұңғышым» деп белгілеймін, Жер патшаларынан үстем етемін.

²⁸Мейірімімді оған мәңгі сақтаймын, Келісімімнен ешқашан бас тартпаймын.

²⁹Дәйім оның ұрпағын нығайтамын, Тағын да көк іспетті шексіз орнатамын.

³⁰Ал ұлдары тастаса Таурат заңымды, Әрі орындамаса бұйрықтарымды,

³¹Егер бұзып жатса ережелерімді, Сақтаудан бас тартса өсиеттерімді,

³²Онда күнәлары үшін таяқпен ұрамын, Зұлым істері үшін қамшымен соғамын.

³³Ал Дәуіттен мейірімімді қайтып алмаймын, Өз адалдығымнан ешқашан таймаймын,

³⁵Мен Дәуітке ант еткенмін біржолата, Қасиеттімін, жалғандық айтпаймын да:

³⁶Әулеті жалғасады шексіз уақытқа, Оның патшалық тағы Менің көз алдымда, Күн іспетті ол әрдайым бар болады да,

³⁷Ай іспетті ол тұрақты болып орнайды, Аспандағы адал айғаққа ұқсайды».

³⁸Ал қазір Сен тағайындаған патшаңнан Сырт айналдың, жаратпай ашуландың оған,

³⁹Қызметшіңмен жасаған Келісіміңнен тандың, Оның тәжін жерге лақтырып арамдадың.

⁴⁰Күллі қамалдарын жойып қираттың, Қорғандарын үйіндіге айналдырдың.

⁴¹Жолшыбай өткендер оны тонайды, Көршілері келекелеп мазақтайды.

⁴²Оның жауларын күшейтіп, үстем еттің, Барлық дұшпандарын шаттыққа кенелттің.

⁴³Патшаның семсерінің жүзін мұқалттың, Шайқаста оны қорғап-қолдамадың.

⁴⁴Оның жарқын салтанатын тоқтаттың, Әрі патшалық тағын жерге құлаттың.

⁴⁵Сен патшаның жастық шағын қысқарттың, Масқараны оған шапандай жаптың.

⁴⁶Қашанғы, уа, Жаратқан, жасырынбақсың? Ием, мәңгі лаулай ма оттай қаһарың?

⁴⁷Ескерші өмірімнің қысқалығын, Қандай бекершілікке адамзатты бұйырдың!

⁴⁸Қай адам ғұмыр кешіп, өлімді көрмеді, Кім ажал тырнағынан өзін құтқарды?

⁴⁹Уа, Ием, қайда бұрынғы зор рақымың, Адалдығың мен Дәуітке берген антың?

⁵⁰Ием, ескере гөр құлыңның мазақталғанын, Көп ұлттың мысқылының көңіліме батқанын,

⁵¹Уа, Жаратқан, жауларыңның балағаттағанын, Өзің бекіткен патшаңның істерін қорлағанын.

⁵²Жаратқан Ие мәңгілік мадақталсын! Аумин, иә, аумин.