Забур жырлары 9

¹Уа, Жаратқан, шын жүректен Сені мадақтаймын, Жасаған кереметтеріңнің бәрін жариялаймын.

²Ұдайы Саған қуанып шаттық ән шырқаймын, Уа, Хақ Тағала, есіміңді Сенің жырлаймын.

³Жауларым шегініп, кері қарай бұрылады, Алдыңда сүрініп құлап, ойран да болады.

⁴Себебі дауымда Сен мүддемді қорғадың, Тағыңда отырып әділ шешім шығардың.

⁵Халықтарды сөгіп, зұлымдарды жоқ қылдың, Есімдерін мәңгілікке өшіріп тастадың.

⁶Жау қару-жарағынан ада қалып, жойылды, Сен қиратқан қалалары із-түзсіз жоғалды.

⁷Рас, Жаратқан Ие мәңгі билік жүргізеді, Ол өз тағын орнатып, төрелік етеді.

⁸Иеміз адамзатқа әділ үкім айтады, Халықтарға ақиқат шешім шығарады.

⁹Қаналғандарға Жаратқан пана болады, Қиын жағдайда зәулім қорған боп тұрады,

¹⁰Сені шын білетіндер Саған сенім артады, Ием, тастап кетпейсің Өзіңе сиынғанды.

¹¹Сионда тұратын Жаратқанға ән шырқаңдар, Оның ғажап істерін бар ұлттарға айтыңдар!

¹²Төгілген қанды ұмытпайтын Ол ескереді, Жәбір шеккеннің айқайына құлағын түреді.

¹³Уа, Жаратқан Ие, маған рақым таныта гөр, Жек көрген жаулардан қиналғанымды байқай гөр, Ажалдың аранынан мені арашалай гөр.

¹⁴Сонда қақпаларында Сион шаһарының Өз ұлылығыңды ұдайы марапаттаймын, Мені құтқарғаныңа қуана ән шырқаймын.

¹⁵Басқа ұлттар қазған өз орларына құлады, Құрған қақпандарына өздері ұсталды.

¹⁶Ием әділ үкім айтып, Өзін ашық танытты, Зұлымдар айлалы істерінің кесірін тартты.

¹⁷Жамандық жасаушылар ажалға душар болады, Құдайды менсінбеген ұлттар соған тап болады.

¹⁸Ал мұқтаж жан біржола ұмытылып кетпейді, Бейшараның үміті мүлдем зая кетпейді.

¹⁹Уа, Ием, көтерілші, пенде жеңіп шықпасын, Халықтарға көз алдыңда үкім шығарылсын!

²⁰Жай пенде екендерін халықтар ұғып алсын, Оларды дірілдетіп қорқытсаң, о, Жаратқан!