Yobu 10

¹Emmeeme yange enyiye obulamu bwange; Naafukumula okwemulugunya kwange; Naayogeza kkabyo lya mmeeme Yange.

²Naagamba Katonda nti Tonsalira musango okunsinga; Ntegeeza kyova owakana nange.

³Okiyita kirungi ggwe okujooga, Okunyooma omulimu gw'engalo zo, N'oyakira okuteesa kw'ababi?

⁴Olina amaaso ag'omubiri, Oba ggwe olaba ng'abantu bwe balaba?

⁵Ennaku zo ziriŋŋanga ennaku ez'abantu, Oba emyaka gyo ng'ennaku ez'abantu,

⁶N'okubuuza n'obuuza obutali butuukirivu bwange, N'onoonya okwonoona kwange,

⁷Newakubadde ng'omanyi nga ssiri mubi; So tewali ayinza okuwonya mu mukono gwo?

⁸Emikono gyo gye gyammumba, gye gyankola Wamu eruuyi n'eruuyi; naye onzikiriza.

⁹Nkwegayiridde, jjukira nga wammumba ng'ettaka; Era olinziza nate mu nfuufu?

¹⁰Tonzituludde ng'amata, N'onkwasa ng'amata amakalu?

¹¹Wannyambaza eddiba n'omubiri, Era wangatta wamu n'amagumba n'ebinywa.

¹²Wampa obulamu n'okuganja, N'okujja kwo gye ndi kwe kwakuuma omwoyo gwange.

¹³Era naye wakisa ebyo mu mutima gwo; Mmanyi ng'ekyo kiri naawe:

¹⁴Bwe nnyonoona, kale oneetegereza, So tolinziyako butali butuukirivu bwange.

¹⁵Bwe mba omubi, nga zinsanze; Era bwe mba omutuukirivu, era naye siriyimusa mutwe gwange; Nga nswazibwa nnyo Era nga ntunuulira ennaku ze ndaba.

¹⁶Era omutwe gwange bwe gwegulumiza, onjigganya ng'empologoma: Era nate weeraga ow'ekitalo gye ndi.

¹⁷Okomyawo buggya abajulirwa bo eri nze, N'onnyongerako okunyiiga kwo; Ebikyukakyuka n'obulwa biri nange.

¹⁸Kale kiki ekyakunziyisa mu lubuto? Nanditadde omukka, so tewandibaddewo liiso eryandindabye:

¹⁹Nandibadde ng'atabangawo; Nandisituliddwa okuva mu lubuto okuntwala mu ntaana.

²⁰Ennaku zange si ntono? Kale lekera awo, Ondeke nsanyusibweko katono,

²¹Nga sinnagenda eyo gye ssiivenga kukomawo, Ye nsi ey'ekizikiza n'ey'ekisiikirize eky'okufa;

²²Ensi ey'ekizikiza ekikutte, ng'ekizikiza kyennyini bwe kiri; Ensi ey'ekisiikirize eky'okufa awatali kuteekateeka, Era omusana gwayo guliŋŋanga ekizikiza.