Yobu 12

¹Awo Yobu n'addamu n'ayogera nti

²Mazima ddala mmwe muli bantu bennyini, Era amagezi galifiira wamu nammwe.

³Naye nange nnina okutegeera so si mmwe mwekka; Mmwe temunsinga: Weewaawo, ani atamanyi ebiri ng'ebyo?

⁴Ninga omuntu asekererwa eri munne, Omusajja eyakaabira Katonda n'amuddamu: Omusajja ow'ensonga era eyatuukirira asekererwa.

⁵Mu kulowooza kw'oyo eyessa mulimu okunyooma akabi; Kweteekeddeteekedde abo abaseerera n'ekigere kyabwe.

⁶Eweema ez'abanyazi ziraba omukisa, N'abo abanyiiza Katonda baba mirembe; Katonda aleeta ebintu bingi mu mukono gwabwe.

⁷Naye nno buuza ensolo, zinaakuyigiriza; N'ennyonyi ez'omu bbanga, zinaakubuulira:

⁸Oba yogera n'ettaka, linaakuyigiriza; N'ebyennyanja ebiri mu nnyanja binaakunnyonnyola.

⁹Ani atamanyi mu ebyo byonna, Ng'omukono gwa Mukama gwe guleese ebyo?

¹⁰Obulamu bwa buli kintu ekiramu buli mu mukono gw'oyo, N'omukka gw'abantu bonna.

¹¹Okutu tekukema bigambo, Era ng'amatama bwe galega ku mmere yaago?

¹²Amagezi gaba n'abasajja abakadde, N'okutegeera kuba mu kuwangaala ennaku nnyingi.

¹³Eri ye eriyo amagezi n'amaanyi; yalina okuteesa ebigambo n'okutegeera.

¹⁴Laba, amenya so tekiyinzika kuzimbibwa nate; Aggalira omuntu so tewayinza kubaawo kuggulawo.

¹⁵Laba, aziyiza amazzi ne gakala; Nate agasindika ne gavuunika ensi.

¹⁶Eri ye eriyo amaanyi n'okukolera ddala; Alimbibwa n'alimba babe.

¹⁷Atwala abateesa b'ebigambo nga banyagiddwa, N'abalamuzi abafuula abasirusiru.

¹⁸Asumulula olujegere lwa bakabaka, Era asiba ekiwato kyabwe n'olukoba.

¹⁹Atwala bakabona nga banyagiddwa, Era amegga ab'amaanyi.

²⁰Abeesigwa amalawo okwogera kwabwe, N'abakadde abaggyako okutegeera kwabwe.

²¹Afuka okunyoomebwa ku balangira, Era asumulula olukoba olw'ab'amaanyi.

²²Ayolesa eby'obuziba ng'abiggya mu kizikiza, Era ayerula ekisiikirize eky'okufa.

²³Ayaza amawanga, era agazikiriza: Abunya amawanga mu nsi, era agakomyawo.

²⁴Abakulu b'abantu ab'omu nsi abaggyako omwoyo, Era abawabiza mu ddungu awatali kkubo.

²⁵Bawammantira mu kizikiza awatali musana, Era abatagassa ng'omutamiivu.