Yobu 13

¹Laba, eriiso lyange lyalaba ebyo byonna, Okutu kwange kwabiwulira ne kubitegeera.

²Bye mumanyi era nange mbimanyi: Mmwe temunsinga.

³Mazima naayogera n'Omuyinza w'ebintu byonna, Era njagala okuteesa ne Katonda.

⁴Naye mmwe mugunja eby'obulimba, Mmwenna muli basawo abataliiko kye bagasa.

⁵Singa musirikidde ddala! Lwe mwandibadde n'amagezi.

⁶Muwulire nno ensonga yange, Mutege okutu eri okuwoza kw'emimwa gyange.

⁷Munawolereza Katonda nga mwogera ebitali bya songa, Era nga muleeta eby’obulimba?

⁸Munaamutya kitiibwa? Munaayomberera Katonda?

⁹Kirungi ye okubakebera? Oba ng'omuntu bw'alimba munne munaamulimba ye?

¹⁰Talirema kubanenya, Bwe munaatya ekitiibwa mu kyama.

¹¹Obukulu bwe obusinga tebulibatiisa N'entiisa ye teribagwako?

¹²Ebigambo byammwe ebijjukirwa ngero za vvu, Enkomera zammwe nkomera za ttaka.

¹³Musirike mundeke njogere, Ebinaayagala okujja binjijire.

¹⁴Kiki ekinaaba kintwaza omubiri gwange mu mannyo gange, Ne nteeka obulamu bwange mu mukono gwange?

¹⁵Newakubadde ng'anzita era naye naamulindiriranga: Era naye naakakasanga amakubo gange mu maaso ge.

¹⁶Era ekyo kye kinaabanga obulokozi bwange; Kubanga omusajja atatya Katonda taatuukenga mu maaso ge.

¹⁷Muwulire nnyo ebigambo byange, N'ebyo bye njatula bibe mu matu gammwe.

¹⁸Laba nno, ndiraanyizza ensonga yange; Mmanyi nga ndi mutuukirivu.

¹⁹Ani anaawakana nange? Kubanga kaakano naasirika ne nta omukka.

²⁰Kyokka tonkola bigambo bibiri, Kale ne sseekweka amaaso go:

²¹Nziyaako omukono gwo gumbeere wala; So n'entiisa yo ereme okunkanga.

²²Kale koowoola ggwe nange naayitaba; Oba leka njogere naawe onziremu.

²³Obutali butuukirivu bwange n'ebibi byange byenkana wa obungi? Ntegeeza okusobya kwange n'okwonoona kwange.

²⁴Okisiza ki amaaso go, N'ompita omulabe wo?

²⁵Onoococca essubi eritwalibwa empewo? Era onooyigganya ebisasiro ebikaze?

²⁶Kubanga ompandiikira ebigambo eby'ekkabyo, Era onsisa obutali butuukirivu obw'omu buto bwange:

²⁷N'ebigere byange obisiba mu nvuba, era olamba amakubo gange gonna; Okoloboza olukoloboze okwetooloola ebigere byange:

²⁸Newakubadde nga nfaanana ekintu ekivundu ekiggwaawo, Ekyambalo ekiriiriddwa ennyenje.