Yobu 16

¹Awo Yobu n'addamu n'ayogera nti Mpulirizza bingi ebiri bwe bityo:

²Mwenna muli basanyusa abatagasa.

³Ebigambo ebitaliimu binaakoma? Oba kiki ekikusosonkereza n'okwanukula n'oyanukula?

⁴Era nange nandiyinzizza okwogera nga mmwe bwe mwogera; Emmeeme yammwe singa ebadde mu kifo ky'emmeeme yange, Nandiyinzizza okutunga ebigambo okubanenya, N'okubanyeenyereza omutwe gwange.

⁵Naye nandibawadde amaanyi n'akamwa kange, N'okusanyusa kw'emimwa gyange kwandikkakkanyizza obuyinike bwammwe.

⁶Newakubadde nga njogera, obuyinike bwange tebunnakkakkana: Era newakubadde nga nzibiikiriza, mpummuzibwa ntya?

⁷Naye kaakano ankooyezza: N'ekibiina kyange kyonna okizisizza.

⁸Era onkwatidde ddala, ye mujulirwa gye ndi: N'obukovvu bwange bungolokokerako, bunnumiriza mu maaso gange.

⁹Antaagudde n'ekiruyi kye, anjigganyizza; Era annumidde obujugu: Omulabe wange ankanulira amaaso.

¹⁰Banjasamidde akamwa kaabwe; Bankubye empi nga banswaza: Bankuŋŋaanirako.

¹¹Katonda angabula eri atatya Katonda, Era ansuula mu mikono gy'ababi.

¹²Nali mpeeraweera n'anjasaamu wakati; Weewaawo, yankwata mu nsingo n'antandaggira okummenyamenya: Era ansimbye okuba sabbaawa ye.

¹³Abalasi be banzingizza enjuyi zonna, Ayasaamu ensigo zange so tasonyiwa; Afuka omususa gwange ku ttaka.

¹⁴Agenda yeeyongera okummenyamenya; Anfubutukirako ng'omuzira.

¹⁵Ntunze ebibukutu ku ddiba lyange, Era ntadde ejjembe lyange mu nfuufu.

¹⁶Amaaso gange goonoonese olw'okukaaba amaziga, Ne ku bikowe byange kuliko ekisiikirize ky'okufa;

¹⁷Newakubadde nga temuli kyejo mu ngalo zange, N'okusaba kwange kulongoofu.

¹⁸Ai ensi, tobikka ku musaayi gwange, N'okukaaba kwange kuleme okubaako we kuliwummulira.

¹⁹Ne kaakano, laba, omujulirwa wange ali mu ggulu, N'omuyima wange ali waggulu.

²⁰Mikwano gyange bannyooma: Naye eriiso lyange lifuuka amaziga eri Katonda;

²¹Azibire ensonga y'omuntu eri Katonda, N'ey'omwana w'omuntu eri munne.

²²Kubanga emyaka si mingi bwe giriggwaako, Nditambula olugendo gye ssiriva okukomawo.