Yobu 19

¹Awo Yobu n'addamu n'ayogera nti

²Mulituusa wa okweraliikiriza emmeeme yange, Ne mummeayamenya n'ebigambo?

³Mwakanvumira emirundi kkumi: Temukwatiddwa nsonyi okunzitoowerera.

⁴N'okukyama newakubadde nga nkyamye, Okukyama kwange kubeera nange mwene.

⁵Okwegulumiza oba nga muneegulumiza eri nze, Ne mundeetako ekivume kyange:

⁶Mutegeere nno nga Katonda ansudde mu nsonga yange, Era anzingizizza n'ekitimba kye.

⁷Laba, njogerera waggulu olw'okujoogebwa, naye ne siwulirwa: Ndaagana nfune obuyambi, naye siraba antaasa.

⁸Azibye ekkubo lyange n'okuyinza ne ssiyinza kuyitamu, Era atadde ekizikiza mu makubo gange.

⁹Anziyeeko ekitiibwa kyange, Era aggye engule ku mutwe gwange.

¹⁰Ammenyemenye enjuyi zonna, era ŋŋenze: N'essuubi lyange alisimbudde ng'omuti.

¹¹Era abuubuusizza obusungu bwe ku nze, Era ampita omu ku balabe be gy'ali.

¹²Eggye lye litabaalira wamu, ne batuuma ekkubo lyabwe ku nze, Ne basiisira okuzingiza eweema yange.

¹³Baganda bange abantadde wala, N'abo be mmanyi bafuukidde ddala nga be ssimanyi:

¹⁴Ab'ekika kyange baweddewo, Ne mikwano gyange ennyo banneerabidde.

¹⁵Abo ababeera mu nnyumba yange n'abazaana bange bampita mugenyi: Ndi munnaggwanga mu maaso gaabwe.

¹⁶Mpita omuddu wange n'atanjitaba, Newakubadde nga mmwegayirira n'akamwa kange.

¹⁷Omukka gwange mukazi wange tagumanyi, N'okwegayirira kwange abaana b'enda ya mmange tebakumanyi:

¹⁸Era n'abaana abato bannyooma; Bwe nnyimuka banjogerako obubi.

¹⁹Emikwano gyange bonna be nteesa nabo bantamiddwa: N'abo be nnayagalanga bakyuse okuba abalabe bange.

²⁰Eggumba lyange lyegatta n'eddiba lyange n'omubiri gwange, Era mponye n'eddiba ly'okumannyo gange.

²¹Munsaasire, munsaasire, ai mmwe mikwano gyange; Kubanga omukono gwa Katonda gunkomyeko.

²²Kiki ekibanjigganyisa nga Katonda, So n'omubiri gwange tegubamala?

²³Singa nno ebigambo byange biwandiikiddwa! Singa biwandiikiddwa mu kitabo!

²⁴Singa byoleddwa ku lwazi N'ekkalaamu ey'ekyuma n'ekisasi okumala emirembe gyonna!

²⁵Naye mmanyi nga Omununuzi wange aba mulamu, Era ku nkomerero ng'aliyimirira ku nsi:

²⁶Era eddiba ly'omubiri gwange bwe lirimala okuzikirizibwa bwe lityo, Naye mu mubiri gwange ndiraba Katonda:

²⁷Gwe ndiraba nze mwene, N'amaaso gange galimutunuulira so si mulala. Emmeeme yange emaliddwawo munda yange.

²⁸Bwe munaayogera nti Nga tunaamuyigganya so! Kubanga ekikolo ky'ekigambo kirabise mu nze;

²⁹Mutyenga ekitala: Kubanga obusungu buleeta okubonereza kw'ekitala. Mulyoke mumanye nga waliwo okusala omusango.