Yobu 21

¹Awo Yobu n'addamu n'ayogera nti

²Muwulire nnyo okwogera kwange; Era bino bibeere bya kubasanyusa.

³Munzikirize, nange naayogera; Kale nga mmaze okwogera, mweyongere okuduula.

⁴Nze neemulugunya eri abantu? Era ekyandindobedde okwesunaasuna kiki?

⁵Munziseeko omwoyo, mwewuunye, Era muteeke omukono gwammwe ku kamwa kammwe.

⁶Bwe njijukira obujjukizi neeraliikirira, Okwesisiwala ne kukwata omubiri gwange.

⁷Ababi babeerera ki abalamu, Ne bakaddiwa ne baba ba maanyi mu buyinza?

⁸Ezzadde lyabwe linywera gye bali bo nga balaba, N'enda yaabwe mu maaso gaabwe.

⁹Ennyumba zaabwe ziba mirembe awatali kutya, So n'omuggo gwa Katonda tegubabaako,

¹⁰Ente yaabwe ennume ezaala n'eteddirira; Ente yaabwe enkazi ezaala n'etesowola mwana gwayo.

¹¹Basindika abaana baabwe abato ng'ekisibo, N'abaana baabwe bazina.

¹²Bayimbira ku bitaasa n'ennanga, Ne basanyukira eddoboozi ly'omulere.

¹³Bamala ennaku zaabwe nga balabye omukisa, Mu kaseera ne bakka mu magombe.

¹⁴Era naye ne bagamba Katonda nti Tuveeko; Kubanga tetwegomba kumanya makubo go.

¹⁵Omuyinza w'ebintu byonna kye ki, ffe tumuweereze? Era bwe tunaamusabanga kinaatugasanga kitya?

¹⁶Laba, omukisa gwabwe teguli mu mukono gwabwe: Okuteesa kw'ababi kundi wala.

¹⁷Ettabaaza y'ababi ezikizibwa emirundi emeka? N'obuyinike bwabwe bubatuukako emirundi emeka? Katonda agaba ennaku mu busungu bwe emirundi emeka?

¹⁸Baba ng'ebisasiro ebitwalibwa n'empewo, Era ng'ebisusunku embuyaga bye zitwala emirundi emeka?

¹⁹Mwogera nti Katonda aterekera abaana be obutali butuukirivu bwe. Abasasule ye yennyini abumanye.

²⁰Amaaso ge galabe okuzikirira kwe ye, Era anywe ku busungu bw'Omuyinza w'ebintu byonna.

²¹Kubanga asanyukira atya ennyumba ye emuddirira, Omuwendo gw'emyezi gye nga gukutuse wakati?

²²Waliwo anaayigirizanga Katonda okumanya? Kubanga asalira abo omusango abagulumizibwa.

²³Wabaawo omu afa ng'alina amaanyi ge gonna, Ng'aweereddeweeredde ddala ng'ateredde:

²⁴Amabeere ge gajjudde amata, N'obusomyo obw'amagumba ge nga bubisi.

²⁵N'omulala afa omwoyo gwe nga gumubalagala, So taleganga ku birungi.

²⁶Bombi bagalamira mu nfuufu, Envunyu n'ebabikkako.

²⁷Laba, mmanyi ebirowoozo byammwe, N'enkwe ze munsalira obubi.

²⁸Kubanga mwogera nti Ennyumba y'omukungu eri ludda wa? Era nti Eweema ababi mwe babeera eri ludda wa?

²⁹Temwababuuza abatambulira mu kkubo? Era temumanyi bubonero bwabwe?

³⁰Ng'omuntu omubi aterekerwa olunaku olw'okulabirako ennaku? Nga batwalibwa eri olunaku olw'obusungu?

³¹Ani anaabuuliranga ekkubo lye mu maaso ge? Era ani anaamusasulanga bye yakola?

³²Naye anaatwalibwanga mu ntaana, Era anaakuumanga amalaalo.

³³Amafunfugu ag'omu kiwonvu ganaamuwoomeranga, N'abantu bonna banaawalulwanga ennyuma we, Nga bwe baamukulembera abatabalika.

³⁴Kale nno munsanyusiza mutya obwereere, Kubanga mu kuddamu kwammwe musigaddemu obulimba busa?