Yobu 23

¹Awo Yobu n'addamu n'ayogera nti

²Ne leero okwemulugunya kwange kujeemu: Okukubibwa kwange kusinga okusinda kwange obuzito.

³Singa mmanyi gye nnyinza okumulabira, Singa nnyinza okutuuka n'awali entebe ye!

⁴Nandiriraanyizza ensonga yange mu maaso ge, Ne njijuza akamwa kange ensonga.

⁵Nandimanye ebigambo bye yandinzizeemu, Ne ntegeera bye yandiŋŋambye.

⁶Yandinnyombesezza olw'obukulu bw'obuyinza bwe? Nedda, naye yandinzisizzaako omwoyo.

⁷Eyo ab'amazima bandiyinzizza okuwoza naye; Bwe nnandiwonyezebbwa bwe ntyo ennaku zonna eri omulamuzi wange.

⁸Laba, ntambula mu maaso, naye ye nga taliiyo; Ne ntambula ennyuma, naye ne ssiyinza kumulaba:

⁹Ku mukono ogwa kkono, bw'akola omulimu, naye ne ssiyinza kumulaba: Yeekweka ku mukono ogwa ddyo n'okulaba ne ssiyinza kumulaba:

¹⁰Naye amanyi ekkubo lye nkwata; Bw'alimala okunkema, ndivaamu nga zaabu.

¹¹Okugulu kwange kwasimbira ddala mu bigere bye; Ekkubo lye nalikwata ne ssikyama.

¹²Siddanga nnyuma okuva mu kiragiro eky'emimwa gye; Natereka ebigambo eby'akamwa ke okusinga emmere yange eŋŋwanira.

¹³Naye ye alowooza bumu, era ani ayinza okumukyusa? Era emmeeme ye kye yeegomba ekyo ky'akola.

¹⁴Kubanga atuukiriza ekyo ekyanteekerwawo: N'ebingi ebiri bwe bityo biri naye.

¹⁵Kyenva neeraliikirira ye okubaawo; Bwe ndowooza mmutya.

¹⁶Kubanga Katonda azirisiza omutima gwange. Era Omuyinza w'ebintu byonna anteganyizza:

¹⁷Kubanga saazikirizibwa okusooka ekizikiza, So teyabikka ku kizikiza ekikutte eri amaaso gange.