Yobu 26

¹Awo Yobu n'addamu n'ayogera nti

²Atalina buyinza ng'omubedde so! Omukono ogutalina maanyi ng'ogulokodde so!

³Atalina magezi ng’omuweeredde so, N'oyatula bingi nnyo eby'okutegeera obulungi!

⁴Ani gw'obuulidde ebigambo? N'omwoyo gwani oguvudde mu ggwe?

⁵Abaafa bakankana wansi w'amazzi n'ababeera omwo.

⁶Amagombe gali bwereere mu maaso ge, N'okuzikirira tekulina kye kwebikka.

⁷Abamba obukiika obwa kkono mu bbanga ejjereere, Era awanika ensi awatali kintu.

⁸Asiba amazzi mu bire bye ebiziyivu; Ekire ne kitayulika wansi we.

⁹Aziba obwenyi bw'entebe ye, N'agyaliirako ekire kye.

¹⁰Yassaawo embibi ku maaso g'amazzi, Okutuusa omusana n'ekizikiza we bikoma.

¹¹Empagi ez'eggulu zikankana ne zeewuunya olw'okunenya kwe.

¹²Afuukuula ennyanja olw'obuyinza bwe, Era afumitira ddala Lakabu olw'okutegeera kwe.

¹³Eggulu liyonjebwa olw'omwoyo gwe; Omukono gwe gwafumita omusota oguwulukuka.

¹⁴Laba, gano ge mabbali gokka ag'amakubo ge: N'akagambo ke tumuwulirako nga katono! Naye okubwatuka okw'obuyinza bwe ani ayinza okukutegeera?