Yobu 27

¹Awo Yobu n'aleeta nate olugero lwe n’ayogera nti

²Nga Katonda bw'ali omulamu alidde ensonga yange; Era Omuyinza w'ebintu byonna, eyeeraliikiriza emmeeme yange;

³(Kubanga obulamu bwange bukyali bulamba mu nze, n'omwoyo gwa Katonda guli mu nnyindo zange;)

⁴Mazima emimwa gyange tegyogere butali butuukirivu, So n'olulimi lwange terwatule bulimba.

⁵Katonda akiddize eri nze okubawa obutuukirivu: Okutuusa lwe ndifa ssiryeggyako obugolokofu bwange.

⁶Obutuukirivu bwange mbunyweza so ssiibutenga: Omutima gwange tegunnenyenga nga nkyali mulamu.

⁷Omulabe wange abe ng'omubi. N'oyo angolokokerako abe ng'atali mutuukirivu.

⁸Kubanga essuubi ly'atamanyi Katonda kye ki, newakubadde nga yeefunira amagoba, Katonda bw'aggyawo obulamu bwe?

⁹Katonda anaawuliranga okukaaba kwe, Ennaku bwe zinaamutuukangako?

¹⁰Anaasanyukiranga Omuyinza w'ebintu byonna, N'akaabira Katonda mu biro byonna?

¹¹N'abayigiriza eby'omukono gwa Katonda; Ekiri n'Omuyinza w'ebintu byonna ssiikikweke.

¹²Laba, mmwe mwenna mmwe bennyini mukirabye; Kale kiki ekyabafuulira ddala abataliiko kye mugasa?

¹³Guno gwe mugabo gw'omuntu omubi eri Katonda, N'obusika, bw'abajoozi bwe baweebwa Omuyinza w'ebintu byonna.

¹⁴Abaana be bwe beeyongera, beeyongerera ekitala; N'enda ye terikkuta mmere.

¹⁵Abanaasigalangawo ku ye banaaziikibwanga mu kufa, ne bannamwandu be tebaakungubagenga.

¹⁶Newakubadde ng'atuuma ffeeza ng'enfuufu, n'ategeka ebyambalo ng'ettaka;

¹⁷Okutegeka ayinza okubitegeka, naye omutuukirivu ye alikyambala, Era ataliiko musango ye aligabana ffeeza.

¹⁸Azimba ennyumba ye ng'ekiwojjolo, Era ng'ensiisira omukuumi gy'akola.

¹⁹Agalamira nga mugagga, naye taakungulwenga; Azibula amaaso, kale nga takyaliwo.

²⁰Ebitiisa bimukwata ng'amazzi; Kibuyaga amutwala kyama kiro.

²¹Embuyaga ez'ebuvanjuba zimutwalira ddala n'agenda; Ne zimuggya mu kifo kye lwa maanyi.

²²Kubanga Katonda alimukasuukirira n'atasaasira: Yandyagadde okudduka mu mukono gwe.

²³Abantu balimukubira mu ngalo, Era balimusooza ave mu kifo kye.