Yobu 30

¹Naye kaakano be nsinga obukulu bansekerera, Bakitaabwe nabanyooma okubateeka wamu n'embwa ez'ekisibo kyange.

²Weewaawo, amaanyi ag'emikono gyabwe gandingasizza ki? Abantu abaweddemu obuvubuka,

³Bakoozimbye olw'okwetaaga n'enjala; Bameketa ettaka ekkalu mu kizikiza eky'okuzika n'okwonooneka.

⁴Banoga enkunga awali ebisaka; N'enkolo ez'omwoloola ye mmere yaabwe.

⁵Bagobebwa wakati mu bantu; Babalangira nga bwe balangira omubbi.

⁶Kibagwanira okubeera mu njatika ez'omu biwonvu, Mu bunnya obw'omu ttaka n'obw'omu njazi.

⁷Balirira mu bisaka, Wansi w'emyennyango we bakuŋŋaanira.

⁸Baana ba basirusiru, weewaawo, baana ba basajja abatalina linnya; Baakubibwa emiggo ne bagobebwa mu nsi.

⁹Kale kaakano nze nfuuse oluyimba lwabwe, Weewaawo, ndi kigambo kya buwemu gye bali.

¹⁰Bantamwa, banneesamba, Tebaleka kumpandira malusu mu maaso.

¹¹Kubanga asumuludde omugwa gwe n'ambonyaabonya, Era basudde olukoba olugoba mu maaso gange.

¹²Ku mukono gwange ogwa ddyo kugolokokera abalalulalu; Basindiikiriza ebigere byange, Era batuuma ku nze amakubo gaabwe ag'okuzikirira.

¹³Boonoona ekkubo lyange, Bongera ku nnaku ze ndabye, Abantu ababulwa ow'okubayamba.

¹⁴Bajja nga bayita mu kituli ekiwagule ekigazi: Wakati mu matongo bangwako.

¹⁵Ebitiisa bikyuse okungwako, Bayigganya ekitiibwa kyange ng'empewo; N'omukisa gwange guweddewo ng'ekire.

¹⁶Era kaakano emmeeme yange efukiddwa munda yange; Ennaku ez'okubonyaabonyezebwamu zinkutte.

¹⁷Ekiro amagumba gange gafumitibwa mu nze, N'obubalagaze obunnuma tebuwummula.

¹⁸Olw'amaanyi amangi ag'endwadde yange ekyambalo kyange kyonoonese: Ensibira ddala ng'ekitogi ky'ekizibawo kyange.

¹⁹Ansudde mu bitosi, Era nfuuse ng'enfuufu n'evvu.

²⁰Nkukaabira so tonziramu: Nayimirira, n'ontunuulira.

²¹Okyuse okuba omukambwe gye ndi: Olw'amaanyi ag'omukono gwo onjigganya.

²²Onsitulira awali empewo n'ozinneebagazaako; Era onsaanuusizza mu kibuyaga,

²³Kubanga mmanyi ng'olintuusa mu kufa, N'eri ennyumba eyateekerwawo abalamu bonna.

²⁴Mazima taagololere mukono gwe ku kifunvu ky'ebyagwa; Newakubadde nga bibeera mu kuzikirira kwe, omuntu ayinza okulira olw'ebyo.

²⁵Saamukaabira amaziga oyo eyali mu nnaku? Emmeeme yange teyanakuwalira oyo eyeetaaga?

²⁶Bwe nnasuubira ebirungi, ebibi ne biryoka bijja; Era bwe nnalindirira omusana, ekizikiza ne kijja.

²⁷Ebyenda byange byesera ne bitawummula: Ennaku ez'okubonyaabonyezebwamu zintuuseeko.

²⁸Ntambula nga mpuubaala awatali njuba: Nnyimirira mu kkuŋŋaaniro ne nkuba enduulu bannyambe.

²⁹Ndi muganda w'ebibe, Ne bamaaya ndi munnaabwe.

³⁰Eddiba ery'omubiri gwange liddugadde, linsasambukako, N'amagumba gange gookeddwa n'ebbugumu.

³¹Ennanga yange kyevudde ekyuka okuwuubaala, N'omulere gwange gufuuse ddoboozi ly'abo abakaaba amaziga.