Yobu 31

¹Nalagaana endagaano n’amaaso gange; Kale nandiyinzizza ntya okutunuulira omuwala?

²Kubanga omugabo gwa Katonda oguva waggulu kye kiki, N'obusika obw'Omuyinza w'ebintu byonna obuva engulu?

³Si buyinike eri atali mutuukirivu, N'okulaba ennaku eri abakola eby'obujeemu?

⁴Talaba makubo gange, N'abala ebigere byange byonna?

⁵Oba nga nali ntambudde n'obutaliimu, Oba nga ekigere kyange kyanguye okukuusakuusa;

⁶(Mpimibwe mu minzaani eyenkanankana, Katonda alyoke amanye obutayonoona bwange;)

⁷Oba nga ekigere kyange kyali kikyamye mu kkubo, N'omutima gwange oba nga gwali gugoberedde amaaso gange, Era oba nga ebbala lyonna lyali lyegasse n'engalo zange:

⁸Kale nze nsige, omulala alye; Weewaawo, emmere ey'omu nnimiro yange esimbulibwe.

⁹Omutima gwange oba nga gwali gusendeddwa eri omukazi, Ne nteegera ku mulyango gwa munnange:

¹⁰Kale mukazi wange aseere omulala, Era abalala bakutame ku ye.

¹¹Kubanga ekyo kyandibadde kya kivve; Weewaawo, kyandibadde kibi ekigwana abalamuzi okukibonereza:

¹²Kubanga muliro ogwokya ne guzikiriza, Era ogwagala okusimbula emmere yange yonna.

¹³Oba nga nali nnyoomye ensonga ey'omuddu wange oba omuzaana wange, Bwe bampawaabira:

¹⁴Kale ndikola ntya, Katonda bw'aligolokoka? Era bw'alinjijira, ndimuddamu ntya?

¹⁵Eyankola nze mu lubuto si ye yamukola ye? Eyatubumba mu lubuto fembi si omu?

¹⁶Oba nga nali nnyimye abaavu kye beegomba, Oba nali mazizzaawo amaaso ga nnamwandu;

¹⁷Oba nali ndidde akamere kange nzekka; So atalina kitaawe taliddeeko.

¹⁸(Nedda, okuva mu buto bwange yakulira wamu nange nga kitaawe, Ne nnamwandu n'abanga mulezi we okuva mu lubuto lwa mmange;)

¹⁹Oba nga nali ndabye n'omu ng'afa olw'okubulwa ebyambalo, Oba eyeetaaga nga talina kye yeebikka:

²⁰Ekiwato kye oba nga tekyanneebaza, Era oba nga tabugumye na byoya bya ndiga zange;

²¹Oba nga nali nnyimusizza omukono gwange eri atalina kitaawe, Kubanga nalaba anannyamba mu mulyango:

²²Kale ekibegabega kyange kive ku nkwakwa, N'omukono gwange gukutuke okuva ku ggumba.

²³Kubanga obuyinike obuva eri Katonda bwabanga ntiisa gye ndi, Era olw'obukulu bwe ne ssibaako kye nnyinza kukola.

²⁴Oba nga nali nfudde zaabu okuba essuubi lyange, Era oba nga nali ŋŋambye zaabu ennungi nti Ggwe bwesige bwange;

²⁵Oba nga nali nsanyuse kubanga obugagga bwange bwali bungi, Era kubanga omukono gwange gwali gufunye bingi;

²⁶Oba nga nali ntunuulidde enjuba, Oba omwezi nga gutambulira mu kumasamasa;

²⁷Omutima gwange ne gusendebwa kyama, Akamwa kange ne kanywegera omukono gwange:

²⁸Era n'ekyo kyandibadde kibi ekigwana abalamuzi okukibonereza: Kubanga nandirimbye Katonda ali waggulu.

²⁹Oba nga nali nsanyukidde oyo eyankyawa ng'azikiridde, Oba nali neeyimusizza obubi bwe bwamulaba;

³⁰(Weewaawo, saaganya kamwa kange kwonoona Nga nsaba obulamu bwe nga nkolima;)

³¹Abasajja ab'omu weema yange oba nga tebaayogera nti Ani ayinza okulaba omuntu atakkuse nnyama ye?

³²Omugenyi teyasulanga mu luguudo; Naye n'aggulirangawo enzigi zange omutambuze;

³³Oba nga nali mbisse ku kusobya kwange nga Adamu, Nga nkisa obutali butuukirivu bwange mu kifuba kyange;

³⁴Kubanga nali ntidde ekibiina ekinene, N'okunyoomebwa ebika ne kunkanga, N'okusirika ne nsirika ne ssiva mu mulyango.

³⁵Singa wabaddewo anampulira! (Laba, kano ke kabonero kange Omuyinza w'ebintu byonna anziremu;) Era mba kuba n'ekyo omulabe wange ky'ampawaabidde ky'awandiise!

³⁶Mazima nandikisitulidde ku kibegabega kyange; Nandikyesibye nga kiremba.

³⁷Nandimubuulidde ebigere byange bwe byenkana omuwendo; Nandimusemberedde ng'omukungu.

³⁸Ensi yange bw'enempawaabira, N'ebibibi byayo ne bikaabira wamu amaziga;

³⁹Oba nga nali ndidde ebibala byamu awatali ffeeza, Oba nali nfiisizza bannyini yo:

⁴⁰Omwennyango gudde mu kifo ky'eŋŋaano. Ne ssere mu kifo kya sayiri. Ebigambo bya Yobu biwedde.