Yobu 33

¹Naye, Yobu, nkwegayiridde, wulira okwogera kwange, Era tega okutu kwo eri ebigambo byange byonna.

²Laba nno, njasamye akamwa kange, Olulimi lwange lwogedde mu kamwa kange.

³Ebigambo byange binaayatula obugolokofu bw'omutima gwange; N'emimwa gyange bye gimanyi bye ginaayogera awatali bukuusa.

⁴Omwoyo gwa Katonda gwe gwankola, N'omukka gw'Omuyinza w'ebintu byonna gwe gumpa obulamu.

⁵Oba, oyinza, nziraamu: Liraanya ebigambo byo mu maaso gange, oyimirire wakati.

⁶Laba, ndi awali Katonda era nga ggwe bw'oli: Era nange nabumbibwa okuva mu ttaka.

⁷Laba, entiisa yange teekukange, So n'okunyigiriza kwange tekuukuzitoowerere.

⁸Mazima oyogedde nze nga mpulira, Nange mpulidde eddoboozi ly'ebigambo byo ng'oyogera nti

⁹Ndi mulongoofu nga ssiriiko kusobya; Ssiriiko musango, so mu nze temuli butali butuukirivu:

¹⁰Laba, anziyako ensonga, Ampita mulabe we;

¹¹Ateeka ebigere byange mu nvuba, Alabirira amakubo gange gonna.

¹²Laba, naakuddamu, mu ekyo tolina nsonga; Kubanga Katonda asinga omuntu obukulu.

¹³Kiki ekikuwakanya naye? Kubanga tabalirira muwendo gwa bigambo bye byonna.

¹⁴Kubanga Katonda ayogera omulundi gumu, Weewaawo, emirundi ebiri, abantu newakubadde nga tebassaayo mwoyo.

¹⁵Mu kirooto, mu kwolesebwa okw'omu kiro, Otulo otungi bwe tukwata abantu, Nga babongoota ku kitanda;

¹⁶Awo n'alyoka aggula amatu g'abantu, N'ateeka akabonero ku kuyigirizibwa kwabwe,

¹⁷Aggye abantu mu kuteesa kwabwe, Era akweke abantu amalala;

¹⁸Aziyiza emmeeme ye okukka mu bunnya, N'obulamu bwe buleme okufa n'ekitala.

¹⁹N'okulumwa kumukangavvula ku kitanda kye, N'okulwana okutamala mu magumba ge:

²⁰Obulamu bwe n'okutamwa ne butamwa emmere, N'emmeeme ye ekyokulya ekiyonjo.

²¹Omubiri gwe gumalibwawo n'okuyinzika ne gutayinzika kulabibwa; N'amagumba ge agaali gatalabika ne gakukunala.

²²Weewaawo, emmeeme ye esemberera obunnya, N'obulamu bwe busemberera abazikiriza.

²³Oba waliwo wamu naye malayika, Omutegeeza, omu mu lukumi, Okwolesa abantu ebibagwanira;

²⁴Awo n'amukwatirwa ekisa n'ayogera nti Muwonye aleme okukka mu bunnya, Ndabye ekinunulo.

²⁵Omubiri gwe guliba muggya okusinga ogw'omwana omuto; Adda mu nnaku z'obuto bwe:

²⁶Asaba Katonda, era amukwatirwa ekisa; N'okulaba alaba amaaso ge n'essanyu: Era awa nate omuntu obutuukirivu bwe.

²⁷Ayimbira mu maaso g'abantu n'ayogera nti Nnyonoonye ne nnyoola ekyo ekyali ekirungi, So ssiriiko kye nnagasibwa:

²⁸Anunudde emmeeme yange obutakka mu bunnya. N'obulamu bwange bunaatunuuliranga omusana.

²⁹Laba, ebyo byonna Katonda abikola, Emirundi ebiri, weewaawo, n'esatu eri omuntu,

³⁰Okukomyawo emmeeme ye mu bunnya, Ayakirwe omusana ogw'abalamu.

³¹Weetegereze nnyo, ai Yobu, ompulire: Sirika, nange naayogera.

³²Oba nga olina eky'okwogera nziraamu: Yogera, kubanga njagala okukufuula omutuukirivu.

³³Oba nga si weewaawo, mpulira: Sirika, nange naakuyigiriza amagezi.