Yobu 36

¹Era nate Eriku ne yeeyongera n'ayogera nti

²Sooka ondeke, nange naakunnyonnyola; Kubanga nkyaliko kye njagala okwogera ku lwa Katonda.

³Naggya wala okumanya kwange, Era naamussaako obutuukirivu Omutonzi wange.

⁴Kubanga mazima ebigambo byange si bya bulimba: Omuntu eyatuukirira mu kumanya ali naawe.

⁵Laba, Katonda wa maanyi, so tanyooma muntu yenna: Wa maanyi mu buyinza obw'okutegeera.

⁶Takuuma bulamu bw'ababi: Naye abawa ababonyaabonyezebwa ebyabwe.

⁷Taggya maaso ge ku batuukirivu Naye awali bakabaka ku ntebe Gy'abateeka emirembe gyonna ne bagulumizibwa.

⁸Era bwe baba nga basibiddwa n'amasamba, Era nga bakwasibwa n'emigwa egy'okubonyabonyezebwa;

⁹Kale n'abalaga omulimu gwabwe, N'okusobya kwabwe nga bagize eby'amalala.

¹⁰Era aggulawo okutu kwabwe okuwulira okuyigirizibwa, N'abalagira bakomewo okuva mu butali butuukirivu.

¹¹Bwe bawulira ne bamuweereza, Banaamalanga ennaku zaabwe nga balabye omukisa, N'emyaka gyabwe nga basanyuka.

¹²Naye bwe batawulira banaazikiriranga n'ekitala, Era banaafanga awatali kumanya.

¹³Naye abo abatamanyi Katonda mu mutima batereka obusungu: Tebakuba nduulu bayambwe bw'abasiba.

¹⁴Bafa nga bakyali bato, N'obulamu bwabwe buzikirira mu abo abatali balongoofu.

¹⁵Awonya oyo abonyabonyezebwa olw'okubonyabonyezebwa kwe, Era aggula okutu kwabwe bwe bajoogebwa.

¹⁶Weewaawo, yandikuggye mu kulaba ennaku N'akuyingiza mu kifo ekigazi awatali kunyigirizibwa; N'ekyo ekiteekebwa ku mmeeza yo kyandijjudde obugimu.

¹⁷Naye ggwe ojjudde omusango gw'omubi: Omusango n'okusala eby'ensonga bikukwata.

¹⁸Kubanga waliwo obusungu, weekuume oleme okutwalibwa n'obugagga So enguzi tekukyamyanga kubanga nnene.

¹⁹Obugagga bwo bunaamala oleme okulaba ennaku, Oba obuyinza bwonna obw'amaanyi go?

²⁰Teweegomba kiro, Amawanga bwe gazikirizibwa mu kifo kyago.

²¹Weekuume oleme okutunuulira obutali butuukirivu: Kubanga weerobozezza obwo okusinga okubonyabonyezebwa.

²²Laba, Katonda akola ebigulumivu mu buyinza bwe: Ani omuyigiriza afaanana ye?

²³Ani eyali amulagidde ekkubo lye? Oba ani ayinza okwogera nti Okoze ebitali bya butuukirivu?

²⁴Jjukira okugulumizanga omulimu gwe, Abantu gwe baayimbangako.

²⁵Abantu bonna baagutunuulira; Abantu baagulengera nga bayima wala.

²⁶Laba, Katonda mukulu, naffe tetumumanyi; Omuwendo gw'emyaka gye tegunoonyezeka.

²⁷Kubanga awalula waggulu amatondo g'amazzi, Agatonnya enkuba eva mu mukka gwe:

²⁸Eggulu ge liyiwa Ne ligatonnya ku bantu mangi nnyo.

²⁹Weewaawo, waliwo ayinza okutegeera ebire bwe bibambibwa, Okubwatuuka okw'omu weema ye?

³⁰Laba, yeeyaliirira omusana gwe okwetooloola; Era asaanikira ku nnyanja wansi.

³¹Kubanga olw'ebyo asala emisango gy'amawanga; Agaba emmere nnyingi nnyo.

³²Abikka engalo ze n'enjota; Era aziragira zikube sabbaawa.

³³Eddoboozi lyazo linnyonnyola ebigambo bye, Era libuulira n'ente kibuyaga ayambuka.