Yobu 38

¹Awo Mukama n'alyoka addamu Yobu ng'ayima mu mbuyaga ez'akazimu n'ayogera nti

²Ani ono aleeta akizikiza mu kuteesa N'ebigambo ebitaliimu kumanya?

³Kale nno weesibe ekimyu ng'omusajja; Kubanga naakubuuza, naawe onziremu.

⁴Wali oli ludda wa bwe nnassaawo emisingi gy'ensi? Yatula oba olina okutegeera.

⁵Ani eyateesa ebigera byayo, oba nga omanyi? Oba ani eyagireegera omugwa?

⁶Emisingi gyayo gyasibirwa ku ki? Oba ani eyassaawo ejjinja lyayo ekkulu ery'oku nsonda;

⁷Emmunyeenye ez'enkya bwe zaayimbira awamu, N'abaana ba Katonda bonna ne boogerera waggulu olw'essanyu?

⁸Oba ani eyasiba ennyanja n'enzigi, Bwe yawaguza ng'ekiva mu lubuto;

⁹Bwe nnafuula ekire okuba ekyambalo kyayo, N'ekizikiza ekikutte okuba ebiwero eby'okubikka,

¹⁰Bwe nnagiragira etteeka lyange, Ne nzisaawo ebisiba n'enzigi,

¹¹Ne njogera nti Wano w'okomanga so tosukkangawo; Era wano amayengo go ag'amalala we gaziyirizibwanga?

¹²Wali olagidde enkya ennaku zo kasookedde zibaawo, Wali omanyisizza emmambya ekifo kyayo;

¹³Ekwate enkomerero z'ensi, Era ababi bakunkumulwe okugivaamu?

¹⁴Ewaanyisibwa ng'ebbumba wansi w'akabonero; N'ebintu byonna bikukunuka ng'ekyambalo:

¹⁵N'ababi omusana gwabwe gubaggibwako, N'omukono ogugulumizibwa gumenyeka.

¹⁶Wali oyingidde mu nsulo ez'ennyanja? Oba wali otambudde mu madubi ag'obuziba?

¹⁷Enzigi ez'okufa zaali zikubikkuliddwa? Oba wali olabye enzigi ez'ekisiikirize eky'okufa?

¹⁸Wali otegedde ensi bw'eri engazi? Yatula, oba nga obimanyi byonna.

¹⁹Ekkubo liri ludda wa eridda mu nnyumba ey'omusana, N'ekizikiza ekifo kyakyo kiri ludda wa;

²⁰Ggwe okukiwerekera ku mbibi yaakyo? Era otegeere okutuuka ku nnyumba yaakyo?

²¹Omanyi, kubanga wali ozaaliddwa mu biro ebyo; N'omuwendo gw'ennaku zo mungi!

²²Wali oyingidde mu mawanika g'amazzi amakwafu, Oba wali olabye amawanika ag'omuzira,

²³Ge nnaterekera ebiro eby'okulabiramu ennaku, Olunaku olw'olutalo n'obulwa?

²⁴Mu kkubo ki omusana mwe gwawukanira, Oba embuyaga ez'ebuvanjuba mwe zisaasaanira ku nsi?

²⁵Ani eyasalira amataba olusalosalo, Oba ekkubo ery'enjota ez'okubwatuka;

²⁶Okutonnyesa enkuba ku nsi okutali muntu; Mu ddungu omutali muntu n'omu;

²⁷Okukkusa ettaka eryazika eryalekebwa; N'okulosa omuddo omuto?

²⁸Enkuba erina kitaawe waayo? Oba ani eyazaala amatondo ag'omusulo?

²⁹Mu lubuto lw'ani omwava amazzi amakwafu? N'omusulo omukwafu omweru ogw'omu ggulu ani eyaguzaala?

³⁰Amazzi gakwekebwa nga gakwekeddwa n'amayinja. Ne kungulu ku buziba nga kukutte.

³¹Oyinza okusiba ekikuukuulu kya Kakaaga, Oba okusumulula olukoba lw'Entungalugoye?

³²Oyinza okufulumya emmunyeenye mu ntuuko zaazo? Oba oyinza okuluŋŋamya Nabaliyo n'abaana be?

³³Omanyi ebiragiro eby'omu ggulu? Oyinza okunyweza okufuga kwalyo mu nsi?

³⁴Oyinza okuyimusa eddoboozi lyo eri ebire, Amazzi amangi ennyo gakubikkeko?

³⁵Oyinza okuweereza enjota zitambule, Ne zikugamba nti Ffe tuutuno?

³⁶Ani eyateeka amagezi mu bitundu eby'omunda? Oba ani eyawa emmeeme okutegeera?

³⁷Ani ayinza okubala ebire olw'amagezi? Oba ani ayinza okuttulula amaliba ag'omu ggulu,

³⁸Enfuufu bw'ekulukuta n'eba effunfugu, Amafunfugu ne geegattira ddala?

³⁹Onooyiggira empologoma enkazi omuyiggo? Oba onokkusa okwegomba kw'abaana b'empologoma,

⁴⁰Bwe zisula mu mpuku zaazo, Ne zibeera mu bisaka okuteega?

⁴¹Ani alabira namuŋŋoona emmere ye, Abaana be bwe bakaabira Katonda, Ne batambulatambula olw'okubulwa ebyokulya?