Yobu 7

¹Abantu tebalina lutalo ku nsi? N'ennaku zaabwe tezifaanana nnaku z'oyo akolera empeera?

²Ng'omuddu ayaayaanira ennyo ekisiikirize, Era ng'oyo akolera empeera bw'asuubira empeera ye:

³Bwe ntyo nange bwe mmazibwa emyezi egitaliiko kye gigasa, N'ebiseera eby'ekiro ebinkooya byanteekerwawo.

⁴Bwe ngalamira ne njogera nti Naayimuka ddi? naye ekiro kirwawo; Era nsula nneekubiira okukeesa obudde.

⁵Omubiri gwange gwambadde envunyu n'amafunfugu; Eddiba lyange liziba ne litulika nate.

⁶Ennaku zange ziwulukuka mangu okusinga obutanta bw'omulusi w'engoye, Era ziggwaawo awatali ssuubi.

⁷Woowe, jjukira ng'obulamu bwange mpewo: Amaaso gange tegakyalaba nate birungi.

⁸Eriiso ly'oyo andaba terikyandaba nate: Amaaso go galiba ku nze, naye nga siriiwo.

⁹Ekire nga bwe kiggwaawo ne kibula, Bw'atyo n'oyo akka mu magombe taalinnyenga kuvaayo.

¹⁰Taddenga nate mu nnyumba ye, So n'ekifo kye tekiimumanyenga nate.

¹¹Kyennaava nnema okuziyiza akamwa kange; Naayogeza obubalagaze bw'omwoyo gwange; Neemulugunyisa obuyinike bw'emmeeme yange.

¹²Nze nnyanja, oba lukwata, N'okussaako n'onzisaako abankuuma?

¹³Bwe njogera nti Ekitanda kyange kinansanyusa, Ekiriri kyange kinaawummuza okwemulugunya kwange;

¹⁴Kale n'olyoka ontiisa n'ebirooto, N'onkanga n'okwolesebwa:

¹⁵Emmeeme yange n'okweroboza ne yeeroboza okutugibwa, N'okufa okusinga amagumba gange gano.

¹⁶Ntamiddwa obulamu bwange; saagala kuba mulamu ennaku zonna: Ndeka; kubanga ennaku zange teziriimu.

¹⁷Omuntu kye kiki, ggwe okumukuza, Era ggwe okumussaako omwoyo gwo.

¹⁸N'okumujjira buli nkya, N'okumukema buli kaseera?

¹⁹Olituusa wa obutanziyangako maaso, N'obutandekanga okumala okumira amalusu gange?

²⁰Oba nga nnyonoonye, nkukola ki ggwe, ggwe alabirira abantu? Kiki ekyakunteesaawo okuba sabbaawa gy'oli, N'okuzitowa ne nneezitoowerera nze nzekka?

²¹Era kiki ekikulobera okusonyiwa okusobya kwange n'okuggyawo obutali butuukirivu bwange? Kubanga kaakano naagalamira mu nfuufu; Naawe olinnoonyeza ddala, naye nze nga siriiwo.