Engero 16

¹Okutegeka omutima kugwanira muntu: Naye okwanukula kw'olulimi kuva eri Mukama.

²Amakubo gonna ag'omuntu gaba malongoofu mu maaso ge ye: Naye Mukama apima emyoyo.

³Emirimu gyo giterese Mukama, N'ebirowoozo byo binaanywezebwanga.

⁴Mukama yakolera buli kintu omulimu gwakyo: Weewaawo, era n'ababi yabakolera olunaku olw'okulabirako ennaku.

⁵Buli muntu alina omutima ogw'amalala wa muzizo eri Mukama: Omukono newakubadde nga gwegatta n'omukono, taliwona kubonerezebwa.

⁶Okusaasira n'amazima bye birongoosa obutali butuukirivu: Era okutya Mukama kwe kuggya abantu mu bubi.

⁷Amakubo ag'omuntu bwe gasanyusa Mukama, Atabaganya naye era n'abalabe be.

⁸Akatono akaliko obutuukirivu Kakira amagoba mangi wamu n'ebitali bya nsonga.

⁹Omutima gw'omuntu guteesa ekkubo lye: Naye Mukama ye aluŋŋamya ebigere bye.

¹⁰Obulaguzi buba mu mimwa gya kabaka: Akamwa ke tekalisobya mu kusala omusango.

¹¹Ebigera n'eminzaani ebituufu biba bya Mukama: Ebipima byonna eby'omu nsawo mulimu gwe.

¹²Okukola obubi kwa muzizo eri bakabaka: Kubanga obutuukirivu bwe bunyweza entebe.

¹³Emimwa emituukirivu bakabaka gye basanyukira; Era baagala oyo ayogera eby'ensonga.

¹⁴Obusungu bwa kabaka babaka ba kufa: Naye omuntu ow'amagezi alibukkakkanya.

¹⁵Mu musana ogw'amaaso ga kabaka mwe muli obulamu; N'okuganza kwe kire kya mu ttoggo.

¹⁶Okufuna amagezi nga kusinga nnyo okufuna zaabu! Weewaawo, okufuna okutegeera kulondebwa okukira ffeeza.

¹⁷Olugendo olw'abagolokofu kuleka bubi: Akuuma ekkubo lye awonya emmeeme ye.

¹⁸Amalala gakulembera okuzikirira, N'omwoyo ogwegulumiza gukulembera ekigwo.

¹⁹Aba n'omwoyo ogwetoowaza wamu n'abaavu Akira agereka omunyago wamu n'ab'amalala.

²⁰Assaayo omwoyo eri ekigambo anaalabanga ebirungi: Era buli eyeesiga Mukama alina omukisa.

²¹Alina omutima ogw'amagezi banaamuyitanga mutegeevu: N'obuwoomerevu bw'emimwa bwongera okuyiga.

²²Okutegeera luzzi lwa bulamu eri nnyini kwo: Naye abasirusiru obusirusiru bwabwe bwe bubabuulirira.

²³Omutima gw'ow'amagezi guyigiriza akamwa ke, Ne gwongera okuyiga ku mimwa gye.

²⁴Ebigambo ebisanyusa bisenge bya njuki, Biwoomera emmeeme, era bwe bulamu eri amagumba.

²⁵Waliwo ekkubo omuntu ly'ayita eddungi, Naye enkomerero yaalyo makubo ga kufa.

²⁶Omululu gw'omukozi gumukolera emirimu. Kubanga akamwa ke kamwegayirira.

²⁷Omuntu ataliiko ky'agasa agunja ettima: Era mu mimwa gye mubaamu omuliro ogusonsomola.

²⁸Omuntu omubambaavu asiga empaka: Era omulyolyomi akyayisa ab'omukwano ennyo.

²⁹Omuntu ow'ekyejo asendasenda munne, N'amutwala mu kkubo eritali ddungi.

³⁰Aziba amaaso, kwe kuteesa ebigambo eby'obubambaavu: Aluma emimwa atuukiriza obubi.

³¹Omutwe oguliko envi ngule ya kitiibwa, Gunaalabikanga mu kkubo ery'obutuukirivu.

³²Alwawo okusunguwala asinga ab'amaanyi; N'afuga omwoyo gwe akira amenya ekibuga.

³³Akalulu kasuulibwa mu lugoye olw'omu kifuba; Naye okulagira kwako kwonna kuva eri Mukama.