Engero 17

¹Akamere akaluma awamu n'obutereevu Kakira ennyumba ejjudde embaga omuli okuyomba.

²Omuddu akola eby'amagezi alifuga omwana akwasa ensonyi, Era aliba n'omugabo ogw'obusika mu b'oluganda.

³Entamu erongoosa eba ya ffeeza, n'ekikoomi kya zaabu: Naye Mukama ye akema emitima.

⁴Akola obubi assaayo omwoyo eri emimwa emibi; N'omulimba awulira olulimi olw'ettima.

⁵Akudaalira omwavu avvoola Omutonzi we: N'oyo asanyukira obuyinike taliwona kubonerezebwa.

⁶Abaana b'abaana ngule ya bakadde; N'abaana ekitiibwa kyabwe bakitaabwe.

⁷Okwogera ebikulu tekusaanira musirusiru: Kale emimwa egirimba gisaanira gitya omulangira?

⁸Ekirabo jjinja lya muwendo mungi mu maaso g'oyo ali nakyo: Gye kikyukira yonna kiraba omukisa.

⁹Abikka ku kusobya anoonya okwagala: Naye ayeeyereza ekigambo akyayisa ab'omukwano ennyo.

¹⁰Okunenya kuyingira nnyo mu nnyini kutegeera Okusinga emiggo kikumi bwe giyingira mu musirisuru.

¹¹Omuntu omubi anoonya bujeemu bwereere; Omubaka omukambwe kyaliva atumibwa okumukwata.

¹²Eddubu enyagiddwako abaana baayo esisinkane n'omuntu, Aleme okusisinkana n'omusirusiru mu busirusiru bwe.

¹³Asasula obubi olw'obulungi, Obubi tebuliva ku nnyumba ye.

¹⁴Okutanula okuyomba kuli ng'omuntu bw'aggulira amazzi: Kale olekanga okuwakana nga tewannabaawo kuyomba.

¹⁵Awa omubi obutuukirivu n'oyo asalira omutuukirivu okumusinga, Bombi benkana okuba ab'omuzizo eri Mukama.

¹⁶Kiki ekibeesaawo omuwendo mu mukono gw'omusirusiru okugula amagezi, Nga talina kutegeera?

¹⁷Ow'omukwano ayagala mu biro byonna, Era ow'oluganda yazaalirwa obuyinike.

¹⁸Omuntu abulwa okutegeera akuba mu ngalo, N'afuuka omuyima mu maaso ga munne.

¹⁹Ayagala okuyomba ayagala okusobya: Agulumiza ennyo omulyango gwe anoonya okuzikirira.

²⁰Alina omutima omubambaavu taliiko bulungi bw'alaba: N'oyo alina olulimi olukyamu agwa mu bubi.

²¹Azaala omusirusiru yeereetako obuyinike: Era kitaawe w'omusirusiru talina ssanyu.

²²Omutima ogujaguza ddagala ddungi: Naye omwoyo ogumenyese gukaza amagumba.

²³Omuntu omubi aggya enguzi mu kifuba, Okukyamya amakubo ag'okusala omusango.

²⁴Amagezi gaba mu maaso g'oyo alina okutegeera: Naye amaaso g'omusirusiru gaba mu njuyi z'ensi ezikomererayo.

²⁵Omwana omusirusiru buyinike bwa kitaawe, Era bubalagaze bwa mukazi eyamuzaala.

²⁶Era okubonereza omutuukirivu si kulungi, Newakubadde okukuba abalungi ng'obalanga obugolokofu bwabwe,

²⁷Aziyiza ebigambo bye alina okumanya: N'oyo alina omwoyo ogw'emmizi muntu mutegeevu.

²⁸Era n'omusirusiru bw'asirika bamuyita wa magezi: Bw'abuniza emimwa gye bamulowooza nga mutegeevu.