Engero 18

¹Eyeeyawula anoonya kye yeegomba yekka, Era alalukira amagezi gonna amatuufu.

²Omusirusiru tasanyukira kutegeera, Naye omutima gwe gwebikkule bwebikkuzi.

³Omubi bw'ajja, n'okunyooma kujja, Era awamu n'okuswazibwa ne wajja n'okuvumibwa.

⁴Ebigambo eby'omukamwa k'omuntu mazzi ga buziba: Oluzzi olw'amagezi mugga ogukulukuta.

⁵Okukkiriza amaaso g'omubi si kulungi, Newakubadde okugoba omutuukirivu bw'awoza.

⁶Emimwa gy'omusirusiru giyingira mu nnyombo, Akamwa ke ne kasaba emiggo.

⁷Akamwa k'omusirusiru kwe kuzikirira kwe, N'emimwa gye kye kyambika eky'emmeeme ye.

⁸Ebigambo eby'omugeyi biri ng'ebiwundu, Era bikka mu bisenge eby'omu lubuto.

⁹Era n'oyo atenguwa ng'akola emirimu Ye muganda w'oyo azikiriza.

¹⁰Erinnya lya Mukama kigo kya maanyi: Omutuukirivu addukira omwo n'aba mirembe.

¹¹Omugagga obugagga bwe kye kibuga kye eky'amaanyi, Era bbugwe muwanvu mu kulowooza kwe ye.

¹²Okuzikiriza nga tekunnabaawo omutima gw'omuntu gwegulumiza, Era okwetoowaza kukulembera ekitiibwa.

¹³Addamu nga tannawulira, Busirusiru n'ensonyi gy'ali.

¹⁴Omwoyo gw'omuntu gunaawaniriranga obunafu bwe; Naye omwoyo omumenyefu ani ayinza okugugumiikiriza?

¹⁵Omutima gw'omutegeevu gufuna okumanya; N'okutu kw'ab'amagezi kunoonya okumanya.

¹⁶Ekirabo eky'omuntu kimuseguliza, Era kimutuusa mu maaso g'abakulu.

¹⁷Asooka okuwoza afaanana nga ye mutuukirivu; Naye munne n'ajja n'amukebera.

¹⁸Akalulu kalekesaayo ennyombo, Era kalamula ab'amaanyi.

¹⁹Ow'oluganda anyiize kizibu okumufuna okusinga ekibuga eky'amaanyi: Era ennyombo eziri bwe zityo ziri ng'ebisiba eby'ekigo.

²⁰Olubuto lw'omuntu lulikkuta ebibala eby'akamwa ke; Ekyengera eky'omu mimwa gye kirimumala.

²¹Okufa n'obulamu biba mu buyinza bw'olulimi; N'abo abalwagala balirya ebibala byalwo.

²²Alaba omukazi okumufumbirwa alaba ekirungi, Era afuna okuganja eri Mukama.

²³Omwavu yeegayirira: Naye omugagga addamu n'ebboggo.

²⁴Akwana emikwano emingi yeereetako okuzikirira: Naye waliwo ow'omukwano eyeegatta ennyo okusinga ow'oluganda.