Engero 19

¹Omwavu atambulira mu butayonoona bwe Akira ow'emimwa emikyamu era omusirusiru.

²Era emmeeme obutaba na kumanya si kirungi; N'oyo ayanguyiriza n'ebigere bye ayonoona.

³Obusirusiru bw'omuntu bwe buvuunika ekkubo lye; N'omutima gwe gunyiigira Mukama.

⁴Obugagga bwongera emikwano mingi: Naye omwavu akyawagana ne mukwano gwe.

⁵Omujulirwa ow'obulimba taliwona kubonerezebwa; N'oyo ayogera eby'okudyeka talirokoka.

⁶Bangi abalimusaba omugabagabanyi obuganzi: Era buli muntu aba mukwano gw'oyo awa ebirabo.

⁷Omwavu baganda be bonna bamukyawa: Mikwano gye tebasinga nnyo kumwewala! Abayigganya n'ebigambo, naye nga bagenze.

⁸Afuna amagezi ayagala emmeeme ye: Anyweza okutegeera aliraba ebirungi.

⁹Omujulirwa ow'obulimba taliwona kubonerezebwa; Naye ayogera eby'obulimba alizikirira.

¹⁰Okwekanasa tekusaanira musirusiru; Kale omuddu okufuga abalangira kusaana kutya?

¹¹Okuteesa kw'omuntu kwe kumulwisaawo okusunguwala; Era okusonyiwa ekyonoono kye kitiibwa kye.

¹²Obusungu bwa kabaka buli ng'okuwuluguma kw'empologoma; Naye obuganzi bwe musulo ku ssubi.

¹³Omwana omusirusiru nnaku za kitaawe: N'okuyomba kw'omukazi kwe kutonnya olutata.

¹⁴Ennyumba n'obugagga bwe busika obuva eri bakitaabwe: Naye omukazi omutegeevu ava eri Mukama.

¹⁵Obugayaavu buleeta otulo tungi; N'omuntu atakola mulimu alirumwa enjala.

¹⁶Akuuma ekiragiro akuuma emmeeme ye: Naye atassaayo mwoyo eri amakubo ge alifa.

¹⁷Asaasira omwavu awola Mukama, Era alimusasula nate ekikolwa kye ekirungi.

¹⁸Kangavvulanga omwana wo, kubanga essuubi weeriri; So teweegomba kuzikirira kwe.

¹⁹Omuntu ow'ekiruyi ekingi aliriwa: Kubanga bw'olimuwonya kirigwanira okukola bw'otyo nate omulundi ogw'okubiri.

²⁰Wuliranga okuteesa, okkirizenga okuyigirizibwa, Obeere n'amagezi enkomerero yo ng'etuuse.

²¹Mu mutima gw'omuntu mulimu okufumiitiriza kungi; Naye okuteesa kwa Mukama kwe kunaanyweranga.

²²Omuntu ekimwagaza kisa kye: N'omwavu akira omulimba.

²³Okutya Mukama kuleeta bulamu: N'oyo ali nakwo anaabeereranga awo nga kumumala; Talijjirwa bubi.

²⁴Omugayaavu annyika omukono gwe mu kibya, So tayagala na kuguzza nate ku kamwa ke.

²⁵Kuba omunyoomi, atalina magezi anaayiga obutegeevu: Era buulirira alina okutegeera; era anaategeera okumanya.

²⁶Anyaga kitaawe n'agoba nnyina, Ye mwana akwasa ensonyi era aleeta ekivume.

²⁷Mwana wange, lekanga okuwulira okuyigirizibwa, Okuleeta okukyama obukyami okuva mu bigambo eby'okumanya.

²⁸Omujulirwa ataaliiko ky'agasa akudaalira omusango: N'akamwa k'ababi kamira obutali butuukirivu.

²⁹Emisango gyategekerwa abanyoomi, N'emiggo gyategekerwa amabega g'abasirusiru.