Engero 28

¹Ababi badduka nga tewali muntu agoberera: Naye abatuukirivu baguma emyoyo ng'empologoma.

²Olw'okusobya kw'ensi bakabaka baamu baba bangi: Naye olw'abantu abalina okutegeera n'okumanya okunywera kwayo kulyongerwako.

³Omuntu eyeetaaga ajooga abaavu Nkuba ewemmenta etalekaawo mmere yonna.

⁴Abo abaleka amateeka batendereza ababi: Naye abo abakwata amateeka bayomba nabo.

⁵Abantu ababi tebategeera musango: Naye abo abanoonya Mukama bategeera byonna.

⁶Omwavu atambulira mu butayonoona bwe Akira obulungi ow'amakubo amakyamu, newakubadde nga mugagga.

⁷Buli akwata amateeka mwana wa magezi: Naye aba mukwano gw'abantu abaluvu akwasa kitaawe ensonyi.

⁸Ayongera ku bintu bye olw'amagoba n'ebisalirwa Akuŋŋaanyiza oyo asaasira abaavu.

⁹Akyusa okutu kwe obutawulira mateeka, N'okusaba kwe kwa muzizo.

¹⁰Buli akyamya abagolokofu mu kkubo ebbi Aligwa ye yennyini mu bunnya bwe ye: Naye abo abatuukirira balisikira ebirungi.

¹¹Omugagga aba wa magezi mu kulowooza kwe ye; Naye omwavu alina okutegeera amukebera.

¹²Abatuukirivu bwe bawangula, wabaawo ekitiibwa ekinene: Naye ababi bwe bagolokoka, abantu beekweka.

¹³Abikka ku kusobya kwe taliraba mukisa: Naye buli akwatula n'akuleka alifuna okusaasirwa.

¹⁴Alina omukisa omuntu atya mu biro byonna. Naye oyo akakanyaza omutima gwe aligwa mu kabi.

¹⁵Ng'empologoma ewuluguma n'eddubu etambulatambula; Bw'abeera bw'atyo omukulu omubi afuga abantu abaavu.

¹⁶Omulangira atalina kutegeera aba mujoozi nnyo era: Naye oyo akyawa omululu aliwangaala ennaku nnyingi.

¹⁷Omuntu eyeebinise omusaayi ogwa buli muntu yenna Aliddukira mu bunnya; tewabangawo muntu amuziyiza.

¹⁸Buli atambula n'obugolokofu aliwonyezebwa: Naye ow'amakubo amakyamu aligwa mangu ago.

¹⁹Alima ensi ye aliba n'emmere nnyingi: Naye agoberera abantu abataliiko kye bagasa aliba n'obwavu obulimumala.

²⁰Omuntu omwesigwa aliba n'okwebazibwa kungi: Naye ayanguwa okugaggawala taliwona kubonerezebwa.

²¹Okusosola mu bantu si kulungi: Newakubadde omuntu okusobya olw'akamere obumere.

²²Alina eriiso ebbi ayanguwa okugoberera obugagga, So tamanyi ng'okwetaaga kulimutuukako.

²³Anenya omuntu oluvannyuma alyeyongera okuganja Okusinga oyo anyumiriza n'olulimi.

²⁴Buli anyaga kitaawe oba nnyina n'ayogera nti Si musango; Oyo ye munne w'omuzikiriza.

²⁵Ow'omwoyo ogw'omululu aleeta oluyombo: Naye eyeesiga Mukama aligejja.

²⁶Eyeesiga omutima gwe ye musirisiru: Naye atambula n'amagezi ye aliwonyezebwa.

²⁷Agabira omwavu teyeetaagenga: Naye akisa amaaso ge anaabanga n'ebikolimo bingi.

²⁸Ababi bwe bagolokoka, abantu beekweka: Naye bwe bazikirira, abatuukirivu beeyongera.