Engero 31

¹Ebigambo bya kabaka Lemweri; ebyalagulwa nnyina bye yamuyigiriza.

²Kiki, mwana wange? era kiki, ai mwana w'olubuto lwange? Era kiki, ai mwana w'obweyamo bwange?

³Towanga bakazi amaanyi go, Newakubadde amakubo go eri ekyo ekizikiriza bakabaka.

⁴Si kwa bakabaka, ai Lemweri, si kwa bakabaka okunywanga omwenge; So si kwa balangira okwogeranga nti Ekitamiiza kiri ludda wa?

⁵Balemenga okunywa ne beerabira amateeka, Ne banyoola omusango gw'omuntu yenna abonyaabonyezebwa.

⁶Mumuwenga ekitamiiza oyo ayagala okufa, N'omwenge oyo alina emmeeme eriko obuyinike:

⁷Anywenga yeerabirenga obwavu bwe, Alemenga okujjukira nate ennaku ze.

⁸Yasamanga akamwa ko olwa kasiru, Okuwoza ensonga y'abo bonna abalekebwa nga tebalina bannaabwe.

⁹Yasamanga akamwa ko osalenga emisango egy'ensonga, Osalirenga emisango omwavu n'eyeetaaga.

¹⁰Omukazi omwegendereza ani ayinza okumulaba? Kubanga omuwendo gwe gusinga wala amayinja amatwakaavu.

¹¹Omutima gwa bba gumwesiga, So taabulwenga magoba.

¹²Amukola bulungi so si bubi Ennaku zonna ez'obulamu bwe.

¹³Anoonya ebyoya by'endiga ne ppamba, N'akola emirimu n'engalo ze n’essanyu.

¹⁴Ali ng'amaato ag'abasuubuzi; Emmere ye agiggya wala.

¹⁵Era agolokoka nga bukyali bwa kiro, N'awa ab'omu nnyumba ye ebyokulya, N'agabira abawala be emirimu gyabwe.

¹⁶Alowooza ennimiro n'agiguia: Asimba olusuku olw'emizabbibu n'ebibala eby'emikono gye.

¹⁷Yeesiba n'amaanyi, N'anyweza emikono gye.

¹⁸Alaba ng'obuguzi bwe bulimu ettunzi: Ettabaaza ye tezikira kiro.

¹⁹Ateeka engalo ze ku muggo ogubaako ppamba, Emikono gye ne gikwata akati akalanga.

²⁰Ayanjululiza omwavu omukono gwe: Weewaawo, agololera emikono gye oyo eyeetaaga.

²¹Omuzira tagutiira ab'omu nnyumba ye; Kubanga ab'omu nnyumba ye bonna bambadde olugoye olumyufu.

²²Yeekolera amagodooli; Ebyambalo bye bafuta nnungi n'olugoye olw'effulungu.

²³Bba amanyibwa mu miryango, Bw'atuula mu bakadde ab'ensi.

²⁴Atunga ebyambalo ebya bafuta n'abitunda; N'awa omusuubuzi enkoba.

²⁵Amaanyi n'okutiibwa bye byambalo bye; Era asekerera ebiro ebigenda okujja.

²⁶Ayasama akamwa ke n'amagezi; N'etteeka ery'ekisa liba ku lulimi lwe.

²⁷Alabirira nnyo empisa ez'ab'omu nnyumba ye, So talya mmere ya kugayaala.

²⁸Abaana be bagolokoka ne bamuyita wa mukisa; Ne bba, n'amutendereza ng'ayogera nti

²⁹Abawala bangi abaakola eby'okwegendereza, Naye ggwe obasinga bonna.

³⁰Okuganja kulimba n'obulungi tebuliiko kye bugasa: Naye omukazi atya Mukama ye anaatenderezebwanga.

³¹Mumuwenga ku bibala eby'emikono gye; N'emirimu gye gimutenderezenga mu miryango.