Zabbuli 103

¹Weebaze Mukama, ggwe emmeeme yange; Ne byonna ebiri munda yange, mwebaze erinnya lye ettukuvu.

²Weebaze Mukama, ggwe emmeeme yange, So teweerabira birungi bye byonna:

³Asonyiwa ebikolwa byo byonna ebitali bya butuukirivu; Awonya endwadde zo zonna;

⁴Anunula obulamu bwo buleme okuzikirira; Akussaako engule ey'ekisa n'okusaasira okulungi:

⁵Akkusa akamwa ko ebirungi; Obuvubuka bwo ne budda obuggya ng'empungu.

⁶Mukama akola eby'obutuukirivu, Atuukiriza emisango ku lw'abo bonna abajoogebwa.

⁷Yamanyisa Musa amakubo ge, N'ebikolwa bye eri abaana ba Isiraeri.

⁸Mukama ajjudde okusaasira n'ekisa, Alwawo okusunguwala, alina okusonyiwa okungi.

⁹Taanenyenga ennaku zonna; So taabenga na busungu mirembe gyonna.

¹⁰Tatukoze ng'ebibi byaffe bwe biri, So tatusasudde ng'ebikolwa byaffe ebitali bya butuukirivu bwe biri.

¹¹Kuba eggulu nga bwe liri waggulu okusinga ensi, N'okusaasira kwe bwe kuli okungi bwe kutyo eri abo abamutya.

¹²Ebuvanjuba n'ebugwanjuba bwe biri ewala, Bw'atyo bw'atutadde ewala ebyonoono byaffe:

¹³Nga kitaabwe bw'asaasira abaana be, Ne Mukama bw'asaasira bw'atyo abamutya.

¹⁴Kubanga amanyi omubiri gwaffe; Ajjukira nga ffe tuli nfuufu.

¹⁵Omuntu, ennaku ze ziri ng'omuddo; Ng'ekimuli eky'omu nsiko, bw'ayera bw'atyo.

¹⁶Kubanga empewo zikikuntako, ne kiba nga kigenze; N'ekifo kyakyo tekirikimanya nate.

¹⁷Naye okusaasira kwa Mukama kwava mu mirembe gyonna era kulituuka mu mirembe gyonna eri abamutya, N'obutuukirivu bwe eri abaana b'abaana;

¹⁸Eri abo abakwata endagaano ye, N'eri abo abajjukira ebiragiro bye okubikola.

¹⁹Mukama yanyweza entebe ye mu ggulu; N'obwakabaka bwe bufuga byonna.

²⁰Mumwebaze Mukama, mmwe bamalayika be: Mmwe abazira ab'amaanyi, abatuukiriza ekigambo kye, Nga muwulira eddoboozi ery'ekigambo kye.

²¹Mumwebaze Mukama, mmwe mwenna eggye lye; Abaweereza be, abakola by'ayagala.

²²Mumwebaze Mukama, mmwe mwenna emirimu gye, Mu bifo byonna by'afugiramu: Weebaze Mukama, ggwe emmeeme yange.