Zabbuli 105

¹Mumwebazenga Mukama, mukaabirenga erinnya lye; Mumanyisenga ebikolwa bye mu mawanga.

²Mumuyimbirenga, muyimbenga okumutendereza; Mwogerenga ku by'amagero bye byonna.

³Mwenyumirizenga olw'erinnya lye ettukuvu: Omutima gw'abo abanoonya Mukama gusanyukenga.

⁴Munoonyenga Mukama n'amaanyi ge; Munoonyenga amaaso ge ennaku zonna.

⁵Mujjukirenga eby'amagero bye bye yakola; Eby'ekitalo bye, n'emisango egy'akamwa ke;

⁶Mmwe ezzadde lya Ibulayimu omuddu we, Mmwe abaana ba Yakobo, abalonde be.

⁷Oyo ye Mukama Katonda waffe: Emisango gye gibuna ensi zonna.

⁸Ajjukira endagaano ye ennaku zonna. Ekigambo kye yalagira emirembe olukumi;

⁹Endagaano gye yalagaana ne Ibulayimu, N'ekirayiro kye yalayirira Isaaka;

¹⁰N'ekyo naakinyweza eri Yakobo okuba etteeka, Eri Isiraeri, okuba endagaano eteriggwaawo:

¹¹Ng'ayogera nti Ggwe ndiwa ensi ya Kanani, Omugabo ogw'obusika bwammwe:

¹²Bwe baali abantu abatono omuwendo gwabwe: Weewaawo, abatono ennyo, era abo batambuze omwo;

¹³Ne batambulatambula mu mawanga agatali gamu, Nga bava mu bwakabaka ne baggukira mu bantu abalala.

¹⁴Teyaganya muntu kuboonoona; Weewaawo, yanenya bakabaka ku lwabwe;

¹⁵Ng'ayogera nti Temukwatanga ku abo be nnafukako amafuta, So temukolanga bubi bannabbi bange.

¹⁶N'ayita enjala okugwa ku nsi; N'amenya omuggo gwabwe gwonna, ye mmere yaabwe.

¹⁷Yabakulembeza omuntu; Yusufu yatundibwa okuba omuddu:

¹⁸Ebigere bye baabirumya enjegere; Yagalamira ng'asibiddwa n'ebyuma:

¹⁹Okutuusa ekigambo kye lwe kyatuukirira; Ekigambo kya Mukama kyamukemanga.

²⁰Kabaka yatuma n'amusumulula; Ye yafuga amawanga, n'amuteera ddala.

²¹N'amufuula omukulu w'ennyumba ye, N'amuteresa ebintu bye byonna:

²²Okusiba abalangira be bw'ayagala, N'okuyigiriza amagezi abakadde be.

²³Era ne Isiraeri n'ajja mu Misiri; Yakobo n'atuula mu nsi ya Kaamu.

²⁴N'ayongera nnyo abantu be, N'abawa amaanyi okusinga abalabe baabwe.

²⁵N'akyusa omutima gwabwe okukyawa abantu be, Okukuusakuusa abaddu be.

²⁶N'atuma Musa omuddu we, Ne Alooni gwe yalonda.

²⁷Ne bassa mu bo obubonero bwe, N'eby'amagero mu nsi ya Kaamu.

²⁸N'aleeta ekizikiza, ekizikiza ne kikwata; Ne bajeemera ebigambo bye.

²⁹N'afuula amazzi gaabwe omusaayi, N'atta ebyennyanja byabwe.

³⁰Ensi yaabwe n'ejjula ebikere, Mu nju za bakabaka baabwe.

³¹N'ayogera, ebitole eby'ensowera ne bijja, N'ensekere mu nsalo zaabwe zonna.

³²N'abawa omuzira mu kifo ky'enkuba, N'omuliro ogwaka mu nsi yaabwe.

³³Era n'akuba n'emizabbibu n'emitiini gyabwe; N'amenya emiti egy’omu nsalo zaabwe.

³⁴N'ayogera, enzige ne zijja, N'obuwuka, era ebyo tebyabalikika omuwendo gwabyo.

³⁵Ne birya buli muddo ogwali mu nsi yaabwe, Ne birya ebibala eby'ettaka lyabwe.

³⁶Era n’akuba n'ababereberye bonna abaali mu nsi yaabwe, Abaali basinga amaanyi mu bazira baabwe bonna.

³⁷N'abaggyamu nga balina effeeza n'ezaabu: So tewaali muntu munafu omu mu bika bye.

³⁸Misiri n’esanyuka bwe baagenda; Kubanga entiisa yaabwe yali ebaguddeko.

³⁹N'ayanjuluza ekire okubabikkangako; N'omuliro gubaakirenga ekiro.

⁴⁰Ne basaba, n'aleeta obugubi, N'abakkusa emmere ey'omu ggulu.

⁴¹N'ayasa ejjinja, amazzi ne gatiiriika; Ne gakulukuta mu bifo ebikalu ng'omugga.

⁴²Kubanga yajjukira ekigambo kye ekitukuvu, Ne Ibulayimu omuddu we.

⁴³N'aggyamu abantu be n'essanyu, N'abatonde be n'okuyimba.

⁴⁴N'abawa ensi ez'amawanga; Ne batwala ne balya emirimu egy'amawanga:

⁴⁵Balyoke bakwatenga ebiragiro bye, Beekuumenga amateeka ge. Mumutendereze Mukama.