Zabbuli 140

¹Omponye, ai Mukama, eri omubi; Onkuume eri omutemu:

²Abayiiya ettima mu mutima gwabwe; Bakuŋŋaananga bulijjo okulwana.

³Basongodde olulimi lwabwe ng'omusota; Obusagwa bw'essalambwa buli wansi w'emimwa gyabwe. (Seera)

⁴Onkuume, ai Mukama, eri emikono gy'ababi; Omponye eri omutemu: Abateesezza okukyamya ebigere byange olw'amaanyi.

⁵Ab'amalala bantegedde omutego n'emigwa; Bayaze ekitimba mu kkubo: Bantegedde ebyambika. (Seera)

⁶Nagamba Mukama nti Ggwe oli Katonda wange: Owulire eddoboozi ery'okwegayirira kwange, ai Mukama.

⁷Ai Katonda Mukama, amaanyi ag'obulokozi bwange. Wambikka ku mutwe gwange ku lunaku olw'olutalo.

⁸Tokkiriza, ai Mukama, omubi by'ayagala; Toyamba lukwe lwe olubi; baleme okwegulumizanga. (Seera)

⁹Omutwe gwabwe abanneetooloola, Ettima ery'emimwa gyabwe bo libabikkengako.

¹⁰Amanda agookya gabagweko: Basuulibwe mu muliro; Mu bunnya obuwanvu, baleme okugolokokanga nate.

¹¹Ayogera obubi taanywerenga mu nsi: Obubi bunaayigganyanga omutemu okumusuula.

¹²Mmanyi nga Mukama aliwoza omusango gw'abo ababonyaabonyezebwa, N'ensonga ey'abanaku.

¹³Abatuukirivu tebalirema kwebaza linnya lyo: Ab'amazima balituula w'oli.