Zabbuli 147

¹Mumutendereze Mukama; Kubanga kulungi okuyimba okutenderezanga Katonda waffe; Kubanga kwa ssanyu, era ettendo liwooma.

²Mukama azimbira ddala Yerusaalemi; Akuŋŋaanya wamu abagobebwa ab'omu Isiraeri.

³Awonya abalina emitima egimenyese, Era asiba ebiwundu byabwe.

⁴Abala emmunyeenye omuwendo gwazo; Azituuma zonna amannya gaazo.

⁵Mukama waffe mukulu, era obuyinza bwe bwa maanyi; Okutegeera kwe tekulowoozekeka.

⁶Mukama awanirira abawombeefu: Asindika wansi ababi.

⁷Mumuyimbire Mukama n'okwebaza; Muyimbe n'ennanga okutendereza Katonda waffe;

⁸Abikka ku ggulu n'ebire, Ateekerateekera ensi enkuba, Amereza omuddo ku nsozi.

⁹Awa ensolo emmere yaazo, Ne bannamuŋŋoona abato abakaaba.

¹⁰Tasanyukira maanyi ga mbalaasi: Teyeesiimira amagulu g'omuntu.

¹¹Mukama yeesiimira abo abamutya, Abo abasuubira okusaasira kwe.

¹²Tendereza Mukama, ggwe Yerusaalemi; Tendereza Katonda wo, ggwe Sayuuni.

¹³Kubanga anywezezza ebisiba by'enzigi zo; Awadde omukisa abaana bo munda yo.

¹⁴Aleeta emirembe mu nsalo zo; Akujjuza obugimu obw'eŋŋaano.

¹⁵Aweereza ekiragiro kye ku nsi; Ekigambo kye kidduka embiro nnyingi.

¹⁶Agabula omuzira ng'ebyoya by'endiga; Amansira omusulo ogukutte empewo ng'evvu.

¹⁷Aweereza amazzi ge agakutte ng'obukunkumuka: Ani ayinza okuyimirira awali empewo ze?

¹⁸Atuma ekigambo kye, n'abisaanuusa: Akunsa empewo ze, amazzi ne gakulukuta.

¹⁹Alaga Yakobo ekigambo kye, Amateeka ge n'emisango gye eri Isiraeri.

²⁰Takolanga bw'atyo ggwanga lyonna: N'emisango gye tebagimanyanga. Mumutendereze Mukama.