Zabbuli 25

¹Gy'oli, ai Mukama, nnyimusiza emmeeme yange.

²Ai Katonda wange, naakwesiganga ggwe, Toŋŋanya kukwatibwa nsonyi; Abalabe bange tobaganya kumpangula.

³Era siwali akulindirira anaakwatibwanga ensonyi: Abo banaakwatibwanga ensonyi abasala enkwe ez'obwereere.

⁴Ondage amakubo go, ai Mukama; Onjigirize empenda zo.

⁵Onnuŋŋamye mu mazima go, onjigirize; Kubanga ggwe oli Katonda ow'obulokozi bwange; Ggwe gwe nnindirira obudde okuziba.

⁶Jjukira, ai Mukama, okusaasira kwo okulungi n'ekisa kyo; Kubanga byaliwo edda n'edda lyonna.

⁷Tojjukira bibi bya buvubuka bwange, newakubadde ebyonoono byange: Onjijukire ng'ekisa kyo bwe kiri, Olw'obulungi bwo, ai Mukama.

⁸Mukama ye mulungi era wa mazima: Kyanaavanga ayigiriza ekkubo abalina ebibi.

⁹Abawombeefu anaabaluŋŋamyanga mu musango: Era abawombeefu anaabayigirizanga ekkubo lye.

¹⁰Amakubo gonna aga Mukama kye kisa n'amazima Eri abo abeekuuma endagaano ye n'okutegeeza kwe:

¹¹Olw'erinnya lyo, ai Mukama, Onsonyiwe obubi bwange, kubanga bunene.

¹²Omuntu atya Mukama aluwa? Oyo gw'anaayigirizanga mu kkubo ly'anaasiimanga.

¹³Emmeeme ye eneetuulanga mu mirembe; N'ezzadde lye linaasikiranga ensi.

¹⁴Ekyama kya Mukama kiri mu abo abamutya; Era anaabalaganga endagaano ye.

¹⁵Amaaso gange gatunuulira Mukama ennaku zonna; Kubanga ye anaggyanga ebigere byange mu kyambika.

¹⁶Onkyukire, onsaasire; Kubanga ndekeddwa omu ne mbonaabona.

¹⁷Ennaku ez'omutima gwange zeeyongedde: Kale onziye mu bibonoobono byange.

¹⁸Lowooza ennaku zange n'okutegana kwange; Era onsonyiwe ebibi byange byonna.

¹⁹Lowooza abalabe bange, kubanga bangi; Era bankyawa obukyayi obukambwe.

²⁰Kale onkuumenga emmeeme yange, omponyenga: Toŋŋanyanga kukwatibwa nsonyi, kubanga nkwesiga ggwe.

²¹Obutuukirivu n'amazima binkuumenga, Kubanga nnindirira ggwe.

²²Nunula Isiraeri, ai Katonda, Mu bibonoobono bye byonna.