Zabbuli 37

¹Teweeraliikiriranga lw'abo abakola obubi, So tokwatibwanga buggya ku abo abakola ebitali bya butuukirivu.

²Kubanga balisalwa mangu ng'essubi, Baliwotoka ng'omuddo ogumera.

³Weesigenga Mukama, okolenga obulungi; Beeranga mu nsi, ogobererenga obwesigwa.

⁴Era sanyukiranga Mukama: Naye anaakuwanga omutima gwo bye gusaba.

⁵Olugendo lwo oluyiringisizenga ku Mukama; Era weesigenga oyo, naye anaakituukirizanga.

⁶Era anaayolesanga obutuukirivu bwo ng'omusana, N'omusango gwo ng'ettuntu.

⁷Sirika eri Mukama, omulindirirenga n'okugumiikiriza: Teweeraliikiriranga lw'oyo alaba ebirungi mu kkubo lye, Olw'omuntu atuukiriza enkwe ez'obubi.

⁸Lekanga obusungu, ovenga mu kiruyi: Teweeraliikiriranga; okwagala obwagazi okuleta obubi.

⁹Kubanga abakola obubi balizikirizibwa: Naye abalindirira Mukama abo be balisikira ensi.

¹⁰Kubanga waliba akaseera katono, n'omubi talibeerawo. Weewaawo, ekifo kye olikitunuulira ddala, naye talibeerawo.

¹¹Naye abawombeefu balisikira ensi: Era banaasanyukiranga emirembe emingi.

¹²Omubi yeekoba ku mutuukirivu, Era aluma bujigi ng'amusunguwalidde.

¹³Mukama alimusekerera: Kubanga alaba ng'olunaku lwe lujja.

¹⁴Ababi basowodde ekitala, baleeze omutego gwabwe; Okusuula omwavu n'omunafu, Okutta abo abatambulira mu kkubo n'amazima.

¹⁵Ekitala kyabwe kirifumita omutima gwabwe bo, N'emitego gyabwe girimenyeka.

¹⁶Ebitono omutuukirivu by'alina Bisinga obugagga obw'ababi abangi.

¹⁷Kubanga emikono gy'ababi girimenyeka: Naye Mukama anyweza abatuukirivu.

¹⁸Mukama amanyi ennaku z'abo abatuukiridde: N'obusika bwabwe bunaabeeranga bwa mirembe gyonna.

¹⁹Tebaakwatibwenga nsonyi mu biro eby'akabi: Ne mu nnaku ez'enjala banakkutanga.

²⁰Naye ababi balibula, N'abalabe ba Mukama baliba ng'ekisinga amasavu mu birundibwa: Balibula; balibulira ddala mu mukka.

²¹Omubi yeewola, n'atasasula nate: Naye omutuukirivu akola eby'ekisa, agaba.

²²Kubanga abaweebwa omukisa gwe balisikira ensi; N'abo abakolimirwa ye balizikirizibwa.

²³Olugendo olw'omuntu lunywezebwa Mukama; Era asanyukira ekkubo lye.

²⁴Newakubadde ng'agwa, talisuulirwa ddala wansi: Kubanga Mukama amunyweza n'omukono gwe.

²⁵Nali muto, kaakano nkaddiye; Naye , sirabanga mutuukirivu ng'alekeddwa, Newakubadde ezzadde lye nga basaba emmere.

²⁶Obudde okuziba akola eby'ekisa, n'awola; N'ezzadde lye liweebwa omukisa.

²⁷Ovenga mu bubi, okolenga obulungi; Obeerengawo emirembe n'emirembe.

²⁸Kubanga Mukama ayagala ensonga, Era taleka batukuvu be; Bakuumibwa emirembe gyonna: Naye ezzadde ery'omubi lirizikirizibwa.

²⁹Abatuukirivu balisikira ensi, Banaagibeerangamu emirembe gyonna.

³⁰Akamwa k'omutuukirivu koogera eby'amagezi, N'olulimi lwe lubuulira ensonga.

³¹Amateeka ga Katonda we gabeera mu mutima gwe; Mu lugendo lwe lwonna taaseererenga.

³²Omubi atunuulira omutuukirivu, Ng'ayagala okumutta.

³³Mukama talimuleka mu mukono gwe, So talimusinza bw'alisalirwa omusango.

³⁴Lindiriranga Mukama, okwatenga ekkubo lye, Naye alikugulumiza okusikira ensi: Ababi bwe balizikirizibwa oliraba.

³⁵Nalaba omubi ng'alina obuyinza obungi, Era ng'agulumidde ng'omuti ogumeze ku ttaka lyagwo.

³⁶Naye bwe baayita, laba, taliiwo: Era namunoonya, naye teyalabika.

³⁷Weekalirizenga oyo atuukiridde, olabenga ow'amazima: Kubanga enkomerero ey'omuntu oyo mirembe.

³⁸Aboonoonyi, bo balizikirizibwa bonna: Enkomerero ddala ey'omubi erizikirizibwa.

³⁹Naye obulokozi obw'abatuukirivu buva eri Mukama: Oyo kye kigo kyabwe mu biro eby'okulabiramu ennaku.

⁴⁰Era Mukama abayamba, n'abawonya: Abawonya eri ababi, n'abalokola, Kubanga beeyunye oyo.