Zabbuli 55

¹Tega okutu eri okusaba kwange, ai Katonda; So teweekweka obutawulira kwegayirira kwange.

²Mpulira, onziremu: Okwemulugunya kwange kunteganya, ne nsinda;

³Olw'eddoboozi ly'omulabe, Olw'okujooga kw'ababi; Kubanga bansuulako ebikolwa ebibi, Era banjigganya mu busungu.

⁴Omwoyo gunnuma nnyo munda yange: N'entiisa ey'okufa enguddeko.

⁵Okutya n'okukankana kuntuuseeko, N'okwekanga kunnumbye.

⁶Ne njogera nti Singa mbadde n’ebiwaawaatiro ng'ejjiba Nandibuuse, ne ŋŋenda, ne mpummula.

⁷Laba, nandikyamidde wala, Nandisuze mu ddungu. (Seera)

⁸Nandyanguye okudduka mu kiddukiro Okuva mu muyaga n'empewo ennyingi.

⁹Bazikirize, ai Mukama, oyawule ennimi zaabwe: Kubanga ndabye ettima n'okuyomba mu kibuga.

¹⁰Emisana n'ekiro batambulatambula ku bbugwe waakyo: Era obubi n'ettima biri wakati mu kyo.

¹¹Okwonoona kuli wakati mu kyo: Okujooga n'obukuusa tebiva mu nguudo zaakyo.

¹²Kubanga omulabe si ye yanvuma; Nandiyinzizza okugumiikiriza: So si oyo eyankyawa eyanneegulumirizaako; Nandyekwese mu maaso ge:

¹³Wabula ggwe, muntu munnange, Eyatambula nange, mukwano gwange gwe namanyiira ennyo.

¹⁴Twateesanga ebigambo n'essanyu fembi, Twatambulanga mu nnyumba ya Katonda n'ekibiina.

¹⁵Okufa kubatuukeko nga tebalowooza, Bakke mu bunnya nga bakyali balamu: Kubanga obubi buli mu nnyumba yaabwe, mu bo wakati.

¹⁶Nze naakaabiriranga Katonda; Era Mukama anandokolanga.

¹⁷Akawungeezi n'enkya ne mu ttuntu neemulugunyanga ne nsindanga: Naye anaawuliranga eddoboozi lyange.

¹⁸Yanunula emmeeme yange mu mirembe mu lutalo olwali lugenda okunsinga: Kubanga abaali balwana nange bangi.

¹⁹Katonda aliwulira, alibaddamu, ye oyo abeerera edda n'edda lyonna, (Seera) Alibaddamu abo abatalaba biggya, Abatatya Katonda.

²⁰Yagolola emikono gye ku abo abaali batabaganye naye: Yanyooma endagaano ye.

²¹Akamwa ke kaali kagonvu ng'omuzigo, Naye omutima gwe kulwana: Ebigambo bye byagonda okusinga amafuta, Naye byali bitala ebisowoddwamu.

²²Gussenga omugugu gwo ku Mukama, naye anaakuwaniriranga: Taaganyenga abatuukirivu okujjulukuka ennaku zonna.

²³Naye ggwe, ai Katonda, olibassa mu bunnya obw'okuzikirira: Abantu abaagala omusaayi n'ab'obulimba tebalimala kitundu kya nnaku zaabwe; Naye nze neesiganga ggwe.