Zabbuli 66

¹Leeta eddoboozi ery'essanyu eri Katonda, ensi yonna:

²Yimbira waggulu ekitiibwa eky'erinnya lye: Gulumiza ettendo lye libe n'ekitiibwa.

³Gamba Katonda nti Emirimu gyo nga gya ntiisa! Olw'obuyinza bwo obungi abalabe bo balikujeemukira.

⁴Ensi yonna erikusinza, Erikuyimbira ggwe; Baliyimbira erinnya lyo. (Seera)

⁵Mujje mulabe emirimu gya Katonda; Ye w'entiisa mu by'akola eri abaana b'abantu.

⁶Ennyanja yagifuula olukalu: Baayita mu mugga n'ebigere: Awo we twamusanyukirira.

⁷Afuga n'amaanyi ge emirembe gyonna; Amaaso ge gatunuulira amawanga: Abajeemu balemenga okwegulumiza. (Seera)

⁸Kale, mmwe amawanga, mumwebazenga Katonda waffe, Muwulize eddoboozi erimutendereza:

⁹Akwatirira emmeeme yaffe obutafa, Era ataganya bigere byaffe okusagaasagana.

¹⁰Kubanga ggwe, ai Katonda, watugeza: Watukema nga bwe bakema effeeza.

¹¹Watuyingiza mu kitimba; Wateeka omugugu omuzito ku biwato byaffe.

¹²Weebagaza abantu okulinnya ku mitwe gyaffe; Twayita mu muliro ne mu mazzi; Naye watuggyamu n'otuyingiza mu kifo eky'obugagga.

¹³Naayingira mu nnyumba yo n'ebiweebwayo ebyokebwa, Naakusasula obweyamo bwange,

¹⁴Emimwa gyange bwe gyayogera, N'akamwa kange bwe kaayatula, bwe nnalaba ennaku.

¹⁵Naakuwa ebyokwokya ebya ssava, N'ebyokwoteza eby'endiga eza seddume; Naawaayo ente n'embuzi. (Seera)

¹⁶Mujje muwulire, mwenna abatya Katonda, Nange ne mbuulira bye yakolera emmeeme yange.

¹⁷Namukoowoola n’akamwa kange, Era yatenderezebwa n'olulimi lwange.

¹⁸Bwe mba ndowooza obutali butuukirivu mu mutima gwange, Mukama taawulire:

¹⁹Naye mazima Katonda awulidde; Alowoozezza eddoboozi ery'okusaba kwange.

²⁰Katonda yeebazibwe, Atagobye kusaba kwange, so tannyimye kusaasira kwe.