Zabbuli 73

¹Mazima Katonda wa kisa eri Isiraeri, Eri abo abalina emitima emirongoofu.

²Naye nze, ebigere byange byali kumpi n'okugwa; Okutambula kwange kwabulako katono okuseerera.

³Kubanga ab'amalala bankwasa obuggya, Bwe nnalaba ababi bwe balina omukisa.

⁴Kubanga bafa tebalumwangako: Naye amaanyi gaabwe ganywera.

⁵Tebalaba nnaku ng'abantu abalala; So tebabonyaabonyezebwa ng'abantu abalala:

⁶Amalala kyegava gabeera ng'omukuufu ogwetooloola obulago bwabwe; Ettima libabikka ng'ekyambalo.

⁷Amaaso gaabwe gabakanuse olw'obugevvu: Balina ebingi okukira omutima bye guyinza okwagala.

⁸Baduula ne boogera eby'okujooga mu bubi: Boogera ebikulu.

⁹Omumwa gwabwe bagutadde mu ggulu, N'olulimi lwabwe lutambulatambula mu nsi.

¹⁰Abantu be kyebava bakomawo wano: N'amazzi ag'omu kikompe ekijjudde ne bagamalirawo ddala.

¹¹Era boogera nti Katonda amanya atya? Era okumanya kuli mu oyo ali waggulu ennyo?

¹²Laba, abo be babi; Era beeyongera mu bugagga nga balina emirembe ennaku zonna.

¹³Mazima nnongooserezza bwereere omutima gwange, Ne nnaaba mu ngalo zange n'obutayonoona;

¹⁴Kubanga nabonyaabonyezebwa okuzibya obudde, Ne nkangavvulwa buli nkya.

¹⁵Singa nayogera nti Ka njogere bwe ntyo; Laba, nandikkusizza emirembe gy'abaana bo.

¹⁶Bwe nnalowooza bwe nnyinza okutegeera ekyo, Kyanteganya ne kinnema;

¹⁷Okutuusa lwe nnagenda mu watukuvu wa Katonda, Ne ndowooza ebibatuukako ku nkomerero.

¹⁸Mazima obateeka mu bifo eby'obuseerezi: Obasuulira ddala ne bazikirira.

¹⁹Nga bafuuse ekifulukwa mu kaseera akatono Entiisa zibamalirawo ddala.

²⁰Ng'ekirooto bwe kiri aloose ng'azuukuse; Era bw'otyo naawe, ai Mukama, bw'olizuukuka, olinyooma ekifaananyi kyabwe.

²¹Kubanga omutima gwange gwannuma, N'emmeeme yange yanfumita;

²²Bwe nnali ng'ensolo bwe ntyo ne ssitegeera; Nali nsolo mu maaso go.

²³Naye ndi wamu naawe ennaku zonna: Onkutte omukono gwange ogwa ddyo.

²⁴Ononnuŋŋamyanga n'amagezi go, Era oluvannyuma olinzikiriza okuyingira mu kitiibwa.

²⁵Ani gwe nnina mu ggulu wabula ggwe? So tewali mu nsi gwe njagala wabula ggwe.

²⁶Omubiri gwange n'omutima gwange bimpwako: Naye Katonda ge maanyi g'omutima gwange n'omugabo gwange emirembe gyonna.

²⁷Kubanga, laba, abakuli ewala balizikirira: Wabafaafaaganya bonna abagenda okwenda ne bakuleka.

²⁸Naye kirungi nze nsemberere Katonda: Mukama Katonda mmufudde ekiddukiro kyange, Ndyoke njogerenga ku bikolwa byo byonna.