Zabbuli 77

¹Naakabiranga Katonda n'eddoboozi lyange; Eri Katonda n'eddoboozi lyange, naye anampuliranga.

²Ku lunaku olw'okunakuwala kwange nanoonya Mukama; Omukono gwange ne gugololebwa ekiro ne gutaddirira; Emmeeme yange n'egaana okusanyusibwa.

³Njijukira Katonda, ne nneeraliikirira: Neemulugunya, omwoyo gwange ne guzirika. (Seera)

⁴Okwata ku maaso gange nga gatunula: Ntegana bwe nti n'okuyinza ne ssiyinza kwogera.

⁵Ndowoozezza ennaku ez'edda, Emyaka egy'ebiro eby'edda.

⁶Njijukira oluyimba lwange ekiro Ne nteesa ebigambo n'omutima gwange nzekka; N'omwoyo gwange gwanoonyeza ddala.

⁷Mukama anaasuuliranga ddala emirembe gyonna? Era anaaba nga takyalina kisa nate?

⁸Okusaasira kwe kugendedde ddala emirembe gyonna? Kye yasuubiza nga kifudde emirembe n'emirembe?

⁹Katonda yeerabidde okuba n'ekisa? Asibye okusaasira kwe okulungi mu busungu? (Seera)

¹⁰Nange ne njogera nti Obwo bwe bunafu bwange; Naye najjukiranga emyaka egy'omukono ogwa ddyo gw'oyo ali waggulu ennyo.

¹¹Naayogeranga ku bikolwa bya Mukama; Kubanga najjukiranga eby'ekitalo byo eby'edda.

¹²Era naalowoozanga omulimu gwo gwonna, Era naafumiitirizanga ebikolwa byo.

¹³Ekkubo lyo, ai Katonda, liri mu watukuvu: Katonda omukulu, ali nga Katonda, ye ani?

¹⁴Ggwe Katonda akola eby'amagero: Wamanyisa amaanyi go mu mawanga.

¹⁵Wanunula abantu bo n'omukono gwo, Abaana ba Yakobo ne Yusufu. (Seera)

¹⁶Amazzi gaakulaba, ai Katonda; Amazzi gaakulaba, ne gatya: Era n'obuziba ne bukankana.

¹⁷Ebire ne bitonnya amazzi; Eggulu ne lireeta eddoboozi : Era n'obusaale bwo ne bubuna.

¹⁸Eddoboozi ery'okubwatuka kwo ne liba mu kikuŋŋunta; Okumyansa ne kumulisa ebintu byonna: Ensi n'ekankana n'eyuuguuma.

¹⁹Ekkubo lyo lyali mu nnyanja. N'empenda zo zaali mu mazzi amangi. N'ebigere byo tebyamanyika.

²⁰Waluŋŋamyanga abantu bo ng'endiga, Mu mukono gwa Musa ne Alooni.