Zabbuli 78

¹Muwulire, mmwe abantu bange, okulagira kwange: Mutege amatu gammwe eri ebigambo eby'akamwa kange.

²Naayasama akamwa kange mu lugero: Naayogera ebigambo eby'ekyama eby'edda:

³Bye twawuliranga, bye twamanyanga, Era bajjajjaffe bye baatubuuliranga.

⁴Tetuubikisenga baana baabwe, Nga tubuulira emirembe egijja amatendo ga Mukama, N'amaanyi ge, n'eby'amagero bye bye yakola.

⁵Kubanga yanyweza obujulirwa mu Yakobo, Era yalagira etteeka mu Isiraeri, Lye yakuutira bajjajjaffe, Babitegeezenga abaana baabwe:

⁶Emirembe egijja gibimanye, be baana abaali bagenda okuzaalibwa; Abaali bagenda okugolokoka n'okubibuulira abaana baabwe:

⁷Balyoke basuubirenga Katonda, So balemenga okwerabira emirimu gya Katonda, Naye bakwatenga amateeka ge:

⁸So balemenga okuba nga bajjajjaabwe, Emirembe emikakanyavu, emijeemu; Emirembe egitalongoosa bulungi omutima gwagyo, N'omwoyo gwagyo nga tegunywera eri Katonda.

⁹Abaana ba Efulayimu, nga balina ebyokulwanyisa n'emitego, Ne bakyuka ennyuma ku lunaku olw'olutalo.

¹⁰Tebaakwata ndagaano ya Katonda, Ne bagaana okutambulira mu mateeka ge;

¹¹Ne beerabira ebikolwa bye, N'eby'amagero bye bye yabalaga.

¹²Yakolera eby'ekitalo mu maaso ga bajjajjaabwe, Mu nsi y'e Misiri, mu nnimiro ya Zowaani.

¹³Yayasa mu nnyanja, n'abayisa wakati; N'ayimiriza amazzi ng'entuumo.

¹⁴Era emisana yabakulemberanga n'ekire, N'ekiro kyonna n'omumuli ogw'omuliro.

¹⁵Yayasa amayinja mu ddungu, N'abanywesa amazzi amangi nga gava mu buziba.

¹⁶Era yaviisa ensulo mu jjinja, N'akulukusa amazzi ng'emigga.

¹⁷Naye ne banyiikira nate okumwonoona, Okujeemera oyo ali waggulu ennyo mu ddungu.

¹⁸Ne bakema Katonda mu mutima gwabwe Nga basaba emmere olw'okwegomba kwabwe.

¹⁹Era naye baayogera obubi ku Katonda; Baagamba nti Katonda ayinza okuteekateeka emmeeza mu ddungu?

²⁰Laba, yakuba ejjinja amazzi ne gatiiriika, Emigga ne gikulukuta; Era ayinza okuwa n'omugaati? Alirabira ennyama abantu be?

²¹Mukama kyeyava awulira, n'asunguwala: Omuliro ne gwaka ku Yakobo, Era n'obusungu ne bunyooka ku Isiraeri:

²²Kubanga tebakkiriza Katonda, So tebeesiga bulokozi bwe.

²³Naye n'alagira eggulu waggulu, N'aggulawo enzigi ez'omu ggulu;

²⁴N'abatonnyesezanga maanu okulya, N'abawanga emmere ey'omu ggulu.

²⁵Abantu ne balyanga emmere ey'abakulu: Yabaweerezanga ebyokulya n'abakkusa.

²⁶N'akunsa empewo eziva ebuvanjuba mu ggulu: Era n'aluŋŋamya n'obuyinza bwe empewo eziva obukiika obwa ddyo.

²⁷Era n'abatonnyeseza ennyama ng'enfuufu, N'ennyonyi ezibuuka ng'omusenyu ogw'ennyanja:

²⁸N'abigwisa wakati mu lusiisira lwabwe, Okwetooloola ennyumba zaabwe.

²⁹Awo ne balya, ne bakkuta nnyo; N'abawa kye baali beegomba.

³⁰Baali nga tebannayawukana n'okwegomba kwabwe, Emmere yaabwe yali ng'ekyali mu bumwa bwabwe,

³¹Obusungu bwa Katonda ne bulinnya ku bo, Ne bubattamu abasinga obunene, Ne buzikiriza abavubuka ba Isiraeri.

³²Era naye ebyo byonna bwe byababaako ne boonoona nate, Ne batakkiriza bya magero bye.

³³Kyeyava amalawo ennaku zaabwe okuzifuula obutaliimu, N'emyaka gyabwe mu kutya.

³⁴Bwe yabatta, bwe baabuuzabuuza okumunoonya: Ne bakomawo ne bakeeranga okunoonya Katonda.

³⁵Ne bajjukira nga Katonda lwe lwazi lwabwe, Era nga Katonda ali waggulu ennyo ye yabanunula.

³⁶Naye baamunyumiriza na kamwa kaabwe, Ne bamulimbalimba n'olulimi lwabwe.

³⁷Kubanga omutima gwabwe tegwalongooka gy'ali, So tebaali beesigwa mu ndagaano ye.

³⁸Naye ye, kubanga yajjula okusaasira, n'asonyiwa obutali butuukirivu bwabwe, n'atazikiriza: Weewaawo, emirundi emingi yabayisaako obusungu bwe, N'atakubiriza busungu bwe bwonna.

³⁹Naye n'ajjukira nga bo mubiri bubiri; Empewo eziyita ne zitadda nate.

⁴⁰Emirundi nga mingi gye baakamujeemera mu ddungu, Ne bamunakuwaliza mu lukoola!

⁴¹Ne bakyuka nate ne bakema Katonda, Ne banyiiza Omutukuvu wa Isiraeri.

⁴²Tebajjukira mukono gwe, Newakubadde olunaku lwe yabanunuliramu eri omulabe.

⁴³Bwe yateeka obubonero bwe mu Misiri, N'eby'amagero bye mu nnimiro ya Zowaani;

⁴⁴N'afuula emigga gyabwe omusaayi, N'enzizi zaabwe ne batayinza kunywa.

⁴⁵N'atuma mu bo ebitole by'ensowera, ezaabaluma; N'ebikere, ebyabazikiriza.

⁴⁶Era n'awa obuwuka ekyengera kyabwe, N'emirimu gyabwe eri enzige.

⁴⁷N'atta emizabbibu gyabwe n'omuzira, N'emisukomooli gyabwe n'empeke ennene ez'omuzira.

⁴⁸Yawaayo n'ente zaabwe eri omuzira, N'endiga zaabwe eri enjota ezaaka.

⁴⁹Yabakasukako obusungu bwe obukambwe, N'okunyiiga, n'okunyiikaala, n'okunakuwala, Ekibiina kya bamalayika abaleeta obubi.

⁵⁰Yakubira obusungu bwe ekkubo, Teyasaasira mmeeme zaabwe okufa, Naye n'awaayo obulamu bwabwe eri olumbe;

⁵¹N'akuba ababereberye bonna abaali mu Misiri, Abaasinga amaanyi mu weema za Kaamu:

⁵²Naye n'aggyamu abantu be ye ng'endiga, N'abaluŋŋamiza mu ddungu ng'ekisibo.

⁵³N'abakulembera mu mirembe bw'ati n'okutya ne batatya: Naye ennyanja n'esuulira ddala abalabe baabwe.

⁵⁴N'abaleeta ku nsalo ey'awatukuvu we, Ku lusozi luno omukono gwe ogwa ddyo lwe gwagula.

⁵⁵Era n'agobamu amawanga mu maaso gaabwe, N'agabawa okuba obusika ng'abagerera, N'atuuza ebika bya Isiraeri mu weema zaago.

⁵⁶Naye ne bakema Katonda ali waggulu ennyo ne bamujeemera, Ne batakwata bye yategeeza;

⁵⁷Naye ne bakyuka ennyuma ne bakuusakuusa nga bajjajjaabwe: Ne bakyama ng'omutego ogw'obulimba.

⁵⁸Kubanga baamusunguwazanga n'ebifo byabwe eby'oku nsozi Ne bamukwasanga obuggya n'ebifaananyi byabwe ebyole.

⁵⁹Katonda bwe yawulira bw'atyo n'asunguwala, N'atamwa nnyo Isiraeri:

⁶⁰N'afuluka mu weema ey'omu Siiro, Eweema gye yali ateese mu bantu;

⁶¹N'awaayo amaanyi ge mu busibe, N'ekitiibwa kye mu mukono gw'omulabe.

⁶²Era n'agabula abantu be eri ekitala; N'asunguwalira obusika bwe:

⁶³Omuliro ne gulya abavubuka baabwe; N'abawala baabwe ne bataba na luyimba lwa kufumbirwa.

⁶⁴Bakabona baabwe ne bafa ekitala; Ne bannamwandu baabwe ne batakuba biwoobe.

⁶⁵Mukama n'alyoka azuukuka ng'azuukuka mu tulo, Ng'omuzira ayogerera waggulu ng'anywedde omwenge.

⁶⁶N'akuba abalabe be ne baddayo ennyuma: N'abakwasa ensonyi ezitaggwaawo.

⁶⁷Era n'agaana eweema ya Yusufu, N'atalonda kika kya Efulayimu;

⁶⁸Naye n'alonda ekika kya Yuda, Olusozi Sayuuni lwe yayagala.

⁶⁹N'azimba awatukuvu we okufaanana ng'ensozi, Ng'ensi gye yanyweza emirembe gyonna.

⁷⁰Era n'alonda Dawudi omuddu we, N'amuggya mu bisibo by'endiga:

⁷¹Mu kugoberera endiga eziyonsa mwe yamuggya, Okulundanga Yakobo be bantu be, ne Isiraeri bwe busika bwe.

⁷²Awo n'abalundanga mu butuukirivu obw'omutima gwe; N'abaluŋŋamyanga n'amagezi g'emikono gye.