Zabbuli 80

¹Ai Omusumba wa Isiraeri, wulira, Ggwe aluŋŋamya Yusufu ng'ekisibo; Ggwe atuula wakati wa bakerubi, yakira ddala.

²Mu maaso ga Efulayimu ne Benyamini ne Manase, kubiriza amaanyi go, Ojje otulokole.

³Otukyuse nate, ai Katonda; Oyase amaaso go, naffe tulirokoka.

⁴Ai Mukama Katonda ow'eggye, Olituusa wa okusunguwalira okusaba kw'abantu bo?

⁵Wabaliisa emmere ey'amaziga, Era wabawa amaziga amangi okunywa.

⁶Otufuula oluyombo eri baliraanwa baffe: N'abalabe baffe baseka bokka na bokka.

⁷Otukyuse nate, ai Katonda ow'eggye; Era oyase amaaso go, naffe tulirokoka.

⁸Waggya omuzabbibu mu Misiri: Wagobamu amawanga, n'ogusimba.

⁹Wasaawa mu maaso gaagwo, Ne gusimba nnyo emmizi, ne gujjula ensi.

¹⁰Ensozi ne zibikkibwa n'ekisiikirize kyagwo, N'amatabi gaagwo ne gaba ng'emivule gya Katonda.

¹¹Gwaloka amatabi gaagwo okutuusa ku nnyanja N'ensibuko zaagwo okutuusa ku Mugga.

¹²Kiki ekyakumenyesa enkomera zaagwo, Bonna abayita mu kkubo ne bagunogako?

¹³Embizzi eva mu kibira egunyaga, N'ensolo ez'omu nsiko zigulyako.

¹⁴Okyuke nate, tukwegayiridde, ai Katonda ow'eggye: Otunuulire wansi ng'oyima mu ggulu, olabe, ojjire omuzabbibu ogwo.

¹⁵N'ekikolo omukono gwo ogwa ddyo kye gwasimba, N'ettabi lye weekolera ery'amaanyi.

¹⁶Gwokeddwa omuliro, gutemeddwa ddala: Bazikirira amaaso go bwe gabanenya.

¹⁷Omukono gwo gube ku musajja ow'omukono gwo ogwa ddyo, Ku mwana w'omuntu gwe weekolera ow'amaanyi.

¹⁸Naffe tetulidda nnyuma okukuleka: Otuzuukize ggwe, naffe tunaakaabiranga erinnya lyo.

¹⁹Otukyuse, nate, ai Mukama Katonda ow'eggye; Oyase amaaso go, naffe tulirokoka.