Zabbuli 81

¹Muyimbirenga waggulu Katonda amaanyi gaffe: Muleetenga eddoboozi ery'essanyu eri Katonda wa Yakobo.

²Mwanukulenga oluyimba, muleetenga ekitaasa, Ennanga ennungi era n'amadinda.

³Mufuuwenga ekkondeere omwezi nga kye gujje guboneke, Omwezi nga gwa ggabogabo, ku lunaku lwaffe olutukuvu olw'embaga.

⁴Kubanga eryo lye tteeka eri Isiraeri, Ekiragiro kya Katonda wa Yakobo.

⁵Yakiteeka mu Yusufu okuba obujulirwa, Bwe yabuna ensi y'e Misiri: Gye nnawuulira olulimi lwe ssaamanya.

⁶N'aggya ekibegabega kye ku mugugu; Engalo ze ne zisumattulwa mu bibbo.

⁷Wakoowoola bwe wali mu nnaku, nange ne nkuwonya; Ne nkuddiramu mu kifo eky'ekyama eky'okubwatuka: Nakukemera ku mazzi ag'e Meriba. (Seera)

⁸Muwulire, mmwe abantu bange, nange naabategeeza: Ggwe Isiraeri, singa okkiriza okumpulira!

⁹Temuubenga katonda munnaggwanga mu ggwe; So toosinzenga katonda munnaggwanga yenna.

¹⁰Nze Mukama Katonda wo, Eyakuggya mu nsi y'e Misiri: Yasama nnyo akamwa ko, nange naakajjuza.

¹¹Naye abantu bange tebaawulira ddoboozi lyange; So Isiraeri teyanjagala n'akatono.

¹²Nange ne mbaleka okugoberera obukakanyavu bw'omutima gwabwe, Batambulirenga mu kuteesa kwabwe bo.

¹³Singa abantu bange bakkiriza okumpulira, Singa Isiraeri akkiriza okutambulira mu makubo gange!

¹⁴Nandiwangudde mangu abalabe baabwe, Nandikyusizza omukono gwange ku abo abalwana nabo.

¹⁵Abakyawa Mukama bandimujeemulukukidde: Naye ekiseera kyabwe kyandibadde kya mirembe gyonna.

¹⁶Era yandibaliisizza n'obugimu obw'eŋŋaano: Era nandikukkusizza n'omubisi gw'enjuki oguva mu jjinja.