Zabbuli 83

¹Ai Katonda, tosirika nate: Toleka kwogera, so tobeererawo, ai Katonda.

²Kubanga, laba, abalabe bo bayoogaana: N'abo abakukyawa bayimusizza omutwe.

³Basala enkwe ku bantu bo, Bateesa wamu obubi ku bantu bo abakweke.

⁴Boogedde nti Mujje tubazikirize balemenga okuba eggwanga; Erinnya lya Isiraeri liremenga okujjukirwa nate.

⁵Kubanga bateesezza wamu n'omwoyo gumu; Balagaana endagaano ku ggwe:

⁶Eweema za Edomu n'ez'Abaisimaeri; Mowaabu, n'Abakagale;

⁷Gebali, ne Amoni, ne Amaleki; Firisutiya awamu n'abo abatuula mu Ttuulo:

⁸Era n'Obwasuli bwegasse nabo; Bayambye abaana ba Lutti. (Seera)

⁹Obakole nga bwe wakola Midiyaani; nga Sisera, nga Yabini, ku mugga Kisoni;

¹⁰Abaazikiririra e Endoli; Ne bafuuka nga obusa ku ttaka.

¹¹Abakungu baabwe obafaananye nga Olebu ne Zeebu; Weewaawo, abalangira baabwe bonna nga Zeba ne Zalumunna:

¹²Abaayogera nti Twetwalire fekka Ennyumba za Katonda tuzirye.

¹³Ai Katonda wange, obafuule ng'enfuufu ey'akazimu; Ng'ebisasiro empewo bye zitwala.

¹⁴Ng'omuliro ogwokya ekibira, Era ng'ennimi z'omuliro ezookya ensozi;

¹⁵Obayigganye bw'otyo ne kibuyaga wo, Era obatiise n'empewo zo.

¹⁶Jjuza amaaso gaabwe okweraliikirira; Banoonyenga erinnya lyo, ai Mukama.

¹⁷Bakwatibwenga ensonyi, batyenga ennaku zonna; Weewaawo, beeraliikirirenga bazikirirenga:

¹⁸Balyoke bategeerenga nga ggwe wekka, erinnya lyo YAKUWA, Oli waggulu nnyo ng'ofuga ensi yonna.