Zabbuli 89

¹Naayimbanga ku kusaasira kwa Mukama ennaku zonna: N'akamwa kange naategeezanga ab'emirembe gyonna obwesigwa bwo.

²Kubanga njogedde nti Okusaasira kunaanywezebwanga okutuusa emirembe n'emirembe; Era ne mu ggulu onoosimbanga obwesigwa bwo.

³Ndagaanye endagaano n'abalonde bange, Ndayiridde Dawudi amuddu wange;

⁴Ezzedde lyo nnaalinywezanga ennaku zonna, N'entebe yo naagizimbiranga ddala emirembe gyonna. (Seera)

⁵N'eggulu linaatenderezanga eby'amagero byo, ai Mukama; Era n'obwesigwa bwo mu kkuŋŋaaniro ery'abatukuvu.

⁶Kubanga ani mu ggulu gwe bayinza okugeraageranya ne Mukama? Ani ku baana b'abakulu ali nga Mukama.

⁷Ye Katonda atiibwa ennyo mu lukiiko olw'abatukuvu, Agwaana okutiibwa okusinga bonna abamwetooloola?

⁸Ai Mukama Katonda ow'eggye, Ani ow'amaanyi, afaanana nga ggwe, ai YA? N'obwesigwa bwo bukwetooloola.

⁹Ggwe ofuga amalala g'ennyanja: Amayengo gaayo bwe gagolokoka, ogateesa.

¹⁰Wamenyaamenya Lakabu ng'omuntu attibwa; Wasaasaanya abalabe bo n'omukono ogw'amaanyi go.

¹¹Eggulu liryo, era n'ensi yiyo: Ebintu byonna n'okujjula kwabyo wabiteekawo.

¹²Obukiika obwa kkono n'obwa ddyo wabutonda: Taboli ne Kerumooni zisanyukira erinnya lyo.

¹³Olina omukono ogw'amaanyi: Engalo zo za maanyi, n'omukono gwo ogwa ddyo gugulumizibwa.

¹⁴Obutuukirivu n'omusango bye binyweza entebe yo: Okusaasira n'amazima bikulembera amaaso go.

¹⁵Balina omukisa abantu abamanyi eddoboozi ery'essanyu: Ai Mukama, batambulira mu musana gw'amaaso go.

¹⁶Basanyukira erinnya lyo okuzibya obudde; Era bagulumizibwa mu butuukirivu bwo.

¹⁷Kubanga ggwe oli kitiibwa ky’amaanyi gaabwe: N'olw'ekisa kyo ejjembe lyaffe linaagulumizibwanga.

¹⁸Kubanga Mukama ye nannyini ngabo yaffe; Era Omutukuvu wa Isiraeri ye nannyini kabaka waffe.

¹⁹Mu biro biri wagambira abatukuvu bo mu kwolesebwa, N'oyogera nti Ntadde obuyambi ku muntu ow'amaanyi; Ngulumizizza omuntu eyalondebwa mu bantu.

²⁰Ndabye Dawudi omuddu wange; Mmufuseeko amafuta gange amatukuvu:

²¹Engalo zange zinaanywezebwanga gy'ali; N'omukono gwange gunaamuwanga amaanyi.

²²Omulabe taamujoogenga: Newakubadde omwana w'obubi taamubonyeebonyenga.

²³Nange naasuulanga abanaalwananga naye mu maaso ge, Era naakubanga abanaamukyawanga.

²⁴Naye obwesigwa bwange n'okusaasira kwange binaabanga naye; Ne mu linnya lyange ejjembe lye linaagulumizibwanga.

²⁵Era naateekanga omukono gwe ku nnyanja, N'omukono gwe ogwa ddyo ku migga.

²⁶Anankaabiranga nti Ggwe kitange, Katonda wange, era ejjinja ery'obulokozi bwange.

²⁷Era ndimufuula omubereberye wange, Asinga bakabaka ab'ensi.

²⁸Naamuterekeranga okusaasira kwange emirembe n'emirembe, N'endagaano yange eneenyweranga gy'ali.

²⁹Era naawangaazanga ezzadde lye emirembe gyonna, N'entebe ye ng'ennaku ez'eggulu.

³⁰Abaana be bwe banaalekanga amateeka gange, Ne batatambuliranga mu misango gyange;

³¹Bwe banaanyoomanga ebiragiro byange, Ne batakwatanga mateeka gange;

³²Nange najjiranga okwonoona kwabwe n'omuggo, N'obutali butuukirivu bwabwe n'okukuba.

³³Naye siimuggirengako ddala kusaasira kwange, So siiganyenga bwesigwa bwange okuweebuuka.

³⁴Siimenyenga ndagaano yange, Sijjululenga kigambo ekyava mu mimwa gyange.

³⁵Omulundi gumu nalayira obutuukirivu bwange; Siimulimbenga Dawudi.

³⁶Ezzadde lye linaabeereranga emirembe gyonna, N'entebe ye ng'enjuba mu maaso gange.

³⁷Eneenywezebwanga ennaku zonna ng'omwezi, Era ng'omujulirwa omwesigwa mu ggulu. (Seera)

³⁸Naye wasuula n'ogoba N'osunguwalira oyo gwe wafukako amafuta.

³⁹Wakyawa endagaano ey'omuddu wo. Wanyooma engule ye n'ogisuula wansi.

⁴⁰Wamenyaamenya enkomera ze zonna; Wayabya ebigo bye.

⁴¹Bonna abayita mu kkubo bamunyaga: Afuuse ekivume eri baliraanwa be.

⁴²Ogulumizizza omukono ogwa ddyo ogw'abalabe be; Osanyusizza abamukyaye bonna.

⁴³Weewaawo, okyamizza obwogi bw'ekitala kye, So tomuyimirizizza mu lutalo.

⁴⁴Omazeewo okumasamasa kwe, N'osuulira ddala entebe ye wansi.

⁴⁵Osaze ku nnaku ez'obuvubuka bwe: Omubisseeko ensonyi. (Seera)

⁴⁶Olituusa wa, ai Mukama, okwekwekanga ennaku zonna? Obusungu bwo bulituusa wa okubuubuukanga ng'omuliro?

⁴⁷Ojjukire, nkwegayiridde, ekiseera kyange bwe kiri ekitono: Abaana b'abantu bonna nga wabatondera ebitaliimu!

⁴⁸Omuntu aluwa aliba omulamu ataliraba kufa, Alyewonya emmeeme ye mu buyinza bw'amagombe? (Seera)

⁴⁹Mukama, okusaasira kwo okw'edda kuli luuyi wa, Kwe walayirira Dawudi mu bwesigwa bwo?

⁵⁰Jjukira, Mukama, abaddu bo bwe bavumibwa; Bwe nsitula mu kifuba kyange ekivume eky'amawanga gonna ag'amaanyi;

⁵¹Abalabe bo kye bavuma, ai Mukama, Kye bavuma ebigere by'oyo gwe wafukako amafuta.

⁵²Mukama yeebazibwenga emirembe n'emirembe. Amiina, era Amiina.