Zabbuli 94

¹Ai Mukama, ggwe Katonda nannyini kuwalana, Ggwe Katonda nannyini kuwalana, omasizemasize ddala.

²Weeyimuse, ggwe asalira ensi emisango: Owe ab'amalala ebibagwanira.

³Mukama, ababi balituusa wa, Ababi balituusa wa okuwangula?

⁴Boogera ebitaliimu n'ebyamalala, Abakozi bobubi bonna beenyumiriza.

⁵Bamenyaamenya abantu bo, ai Mukama, Era babonyaabonya obusika bwo.

⁶Batta nnamwandu ne munnaggwanga, Era batta atalina kitaawe.

⁷Ne boogera nti Mukama taalabe, So Katonda wa Yakobo taalowooze.

⁸Mulowooze, mmwe abali ng'ensolo mu bantu: Nammwe abasirusiru, muligeziwala ddi?

⁹Eyateekawo okutu, taliwulira? Eyabumba eriiso, taliraba?

¹⁰Abonereza amawanga, talikangavvula, Ayigiriza abantu amagezi?

¹¹Mukama amanyi ebirowoozo by'abantu, Nga mukka.

¹²Alina omukisa omuntu gw'obonereza, ai Mukama, Era gw'oyigiriza ebiva mu mateeka go;

¹³Olyoke omuwummuze aleme okulaba ebiro eby'ennaku, Okutuusa obunnya lwe bulisimirwa ababi.

¹⁴Kubanga Mukama talisuula bantu be, So talireka busika bwe.

¹⁵Kubanga omusango gulidda mu butuukirivu: Ne bonna abalina emitima egy'amazima balibugoberera.

¹⁶Ani anangolokokera ku abo abakola obubi? Ani anannyimiririra ku bakozi b'ebitali bya butuukirivu?

¹⁷Singa Mukama teyali mubeezi wange, Emmeeme yange yanditudde mangu awali okusirika.

¹⁸Bwe nnayogera nti Ekigere kyange kiseerera, Okusaasira kwo, ggwe Mukama, ne kumpanirira.

¹⁹Mu birowoozo byange ebingi ebiri mu nze Okusanyusa kwo kumpoomera emmeeme yange.

²⁰Abafuga ababi balissa ekimu naawe, Abalagira eby'ettima mu mateeka?

²¹Bakuŋŋaana okulumba emmeeme y'omutuukirivu, Ne basala omusango okusinga omusaayi ogutaliiko kabi.

²²Naye Mukama yabanga kigo kyange ekiwanvu; Era Katonda wange lye jjinja lye nneeyuna.

²³Era abaleeseeko obutali butuukirivu bwabwe bo, Era alibazikiriza mu bubi bwabwe; Mukama Katonda waffe alibazikiriza.