Ecclesiastes 11

¹Ikia irio ciaku igũrũ rĩa maĩ; nĩ ũndũ nĩũgaciona matukũ maingĩ maathira.

²He andũ mũgwanja o mũndũ rũĩga rũake, ĩĩ, o na kana anana; nĩ ũndũ ndũngĩmenya ũũru ũrĩa ũkoneka gũkũ thĩ.

³Matu mangĩiyũrũo nĩ mbura-rĩ, moiragĩra thĩ o na mũtĩ ũngĩgũa thĩ ũrorete mwena wa gũthini, kana mwena wa gathigathini, o harĩa ũngĩgũa, hau noho ũgaikara.

⁴Ũrĩa ũbaraga rũhuho ndakahanda, o na ũrĩa ũroraga matu ndakagetha.

⁵O ta ũrĩa ũtoĩ njĩra ĩrĩa rũhuho rũgeraga rũkĩhurutana, o na ta ũrĩa ũtoĩ ũrĩa mahĩndĩ makũragĩra nda ya mũtumia ũrĩa ũrĩ ihu; o ũguo noguo ũtangĩmenya wĩra wa Ngai ũrĩa ũũmbaga indo ciothe.

⁶Rũcinĩ roka kũhanda mbeũ ciaku, o na ningĩ hwaĩ-inĩ ndũkahurũkie guoko gwaku; nĩ gũkorũo ndũũĩ ĩrĩa ĩkaagĩra, hihi nĩ ĩo, kana nĩ ĩrĩa ĩngĩ, o na kana hihi o cierĩ nĩikaagĩra.

⁷Ti-itherũ ũtheri nĩ mwega, o namo maitho makĩona riũa nĩ ũndũ mwagĩru.

⁸Ĩĩ-ni, o na mũndũ angĩtũũra mĩaka mĩingĩ-rĩ, nĩamĩkenagĩre yothe; no rĩrĩ, nĩaririkanage matukũ marĩa ma nduma, tondũ nĩmakaingĩha. Namo macio mothe mokaga thutha no ma tũhũ.

⁹Atĩrĩrĩ, wee mwanake ũyũ, kenagĩra ũnyinyi waku; o nayo ngoro yaku ĩgũkenagie matukũ-inĩ maku ma wĩthĩ, na ũthiage na mĩthiĩre ĩrĩa wĩendeire na ngoro yaku, o na ĩrĩa yonagwo ĩrĩ mĩega nĩ maitho maku: ĩndĩ maũndũ macio mothe-rĩ, menya atĩ Ngai nĩagagũcirithĩria.

¹⁰Tondũ ũcio eheria kĩeha gĩkuume ngoro-inĩ yaku, o na ũthengie waganu ũkuume mwĩrĩ; nĩ ũndũ wĩthĩ o na wanake no wa tũhũ.