Ecclesiastes 12

¹Ririkanaga ũrĩa Mũkũũmbi matukũ maku ma ũnyinyi, mũira wa matukũ ma ũũru moke, o na mĩaka ĩkuhĩhĩrie, o ĩrĩa ũkoiga atĩrĩ, Ha ũhoro wayo-rĩ, kaĩ ndikenaga-ĩ!

²O na riũa, na ũtheri, na mweri, o na njata itanahorio nduma, o na matu matanacoka gũkorũo ho, mbura yathira;

³o mũthenya ũrĩa aikaria a nyũmba makainaina, o namo makarau meinamie na thĩ, nao athĩi matige gũcoka gũthĩa nĩ ũndũ nĩ anyinyi, o nao arĩa macũthagĩrĩria na ndirica matumanĩrũo nĩ nduma;

⁴o nayo mĩrango ya gũkinya barabara-inĩ ĩhingwo; o na rĩrĩa mũgambo wa gũthĩa ũkanyiha, o nake mũndũ akaroka gũũkĩra nĩ kũigua mũgambo wa nyoni, o nayo mĩgambo ya airĩtu othe arĩa mainaga nyĩmbo ĩnyihio;

⁵ĩĩ, ti-itherũ o na metigĩre ũgwati uumĩte igũrũ, na magwatwo nĩ guoya njĩra-inĩ; o naguo mũtĩ ũrĩa wĩtagwo mũrothi ũrute kĩro, o nayo ndaahi ĩtuĩke o ta mũrigo, o namo merirĩria maage hinya; nĩ gũkorũo mũndũ arorete kwao kũrĩa agatũũra ihinda iraya, o nao arĩrithania magathiangaga njĩra-inĩ;

⁶o mbere mũhĩndo wa betha ũtanatuĩka, na mbuuri ya thahabu yoragwo, o na ndigithũ ĩthuthĩkĩre itherũkĩro-inĩ rĩa maĩ, kana kũgũrũ kwa ngari kuunĩkĩre irima-inĩ rĩa maĩ;

⁷o naruo rũkũngũ rũgĩcoke gũtuĩka tĩri o ta ũrĩa rũatariĩ, naguo roho ũcokerere Ngai ũrĩa waũheanire.

⁸Maũndũ mothe nĩ ma tũhũ, ũguo nĩguo Mũhunjia ekuuga, mothe no tũhũ biũ.

⁹O na ningĩ tondũ wa ũrĩa Mũhunjia ũcio aarĩ mũũgĩ-rĩ, no aakĩrĩrĩirie kũruta andũ ũmenyi maũndũ; ĩĩ, ti-itherũ nĩecũranagia, na agatuĩria maũndũ, o na akamaaragania na thimo nyingĩ.

¹⁰Mũhunjia ũcio-rĩ, aacaragia ndeto iria ingĩkenia andũ, na iria ciandĩkĩtwo irũngĩrĩirie, o cio ndeto cia ũhoro-wa-ma.

¹¹Ciugo cia andũ arĩa ogĩ-rĩ, ihaana ta mĩcengi, o nacio ciugo cia anene a ciũngano ihaana ta nyambo ihũrĩrĩirũo wega, ikarũma ciumĩte harĩ mũrĩithi ũmwe.

¹²O na ningĩ makĩria, mũrũ wakwa-rĩ, ĩtĩkĩra gũtaarũo: gũthondeka mabuku maingĩ-rĩ, gũtikĩrĩ mũthia; nakuo gũthoma mũno nĩ kwĩnogia mwĩrĩ.

¹³Kĩrĩkĩrĩro kĩa ndeto icio ciothe nĩ gĩkĩ, atĩ maũndũ mothe nĩmaiguĩtwo; wĩtigĩre Ngai, na ũmenyagĩrĩre maathani make; nĩ ũndũ gwĩka ũguo nĩ kũhingia maũndũ mothe marĩa mũndũ aagĩrĩirũo nĩ gwĩka.

¹⁴Nĩ ũndũ Ngai nĩagacirithanĩria mawĩra mothe, hamwe na maũndũ mothe ma hitho, o na mangĩkorũo marĩ mega kana marĩ moru.