Song of Solomon 1

¹RŨRŨ nĩruo Rũĩmbo rũrĩa rũkĩrĩte nyĩmbo ciothe, o ruo rũrĩa rũa Suleimani.

²Ta nĩa’mumunye na mamumunya ma kanua gake: amu-rĩ, mĩendere ĩrĩa ũnyendaga nayo nĩ mĩega o na gũkĩra ndibei.

³Maguta macio wĩhakĩte me na mũtararĩko mwega; rĩĩtwa rĩaku-rĩ, no ta maguta manungi wega magĩitanĩrĩrio; tondũ wa ũguo, nĩwendetwo nĩ airĩtu.

⁴Ta ngucia, tũteng’ere nawe! mũthamaki nĩandonyetie nyũmba-inĩ ciake cia thĩinĩ: tũrĩcanjamũkaga tũgĩkenaga nĩ ũndũ waku; wendani waku tũrĩũganaga o na gũkĩra ndibei: o na tondũ makwendete-rĩ, me na kĩhooto.

⁵Niĩ-rĩ, kũira nĩnjirĩte, no ndĩ o mwagĩru, andũ-a-nja aya a Jerusalemu; njirĩte o ta hema cia Kedari, na ngaagĩra o ta mbathiya iria njuurie gwa Suleimani.

⁶Tigani kũndora nĩ ũndũ atĩ ndĩ mũirairũ, atĩ nĩ ũndũ nĩnjinĩtwo nĩ riũa. Nĩ rĩrĩ, nĩ ariũ a maitũ maandakarĩire, magĩkĩndũma nduĩke mũthondeki wa mĩgũnda ya mĩthabibu: ĩndĩ mũgũnda wakwa niĩ mwene, ndiraũmenyagĩrĩra.

⁷Ĩ wee mwendwo nĩ ngoro yakwa-ĩ, njĩra harĩa ũrarĩithia! njĩra harĩa ũkwarahia rũũru rũaku mĩaraho! thima-rĩ, nĩ kĩ kĩngĩtũma njikare ta mũndũ mũhumbe maitho ndũru-inĩ cia a-thiritũ aku?

⁸Akorũo ndũkũmenya ũguo, wee mũthaka kũrĩ andũ-a-nja othe-rĩ, no kĩĩumagarĩre ũtwarane na makinya ma rũũru, ũkarĩithie tũũri twaku ndwere-inĩ cia hema cia arĩithi.

⁹Wee, mũrata wakwa-rĩ, ngũgerekanĩtie na mbarathi ya ngari-inĩ cia Firauni.

¹⁰Thĩa ciaku-rĩ, nĩ njagĩrĩre mũno nĩ njuĩrĩ icio ũkĩndĩte, ngingo yaku nayo ĩkaagĩrĩrũo nĩ mĩgathĩ.

¹¹Ithuĩ na ithuĩ tũgũgũthondekithĩria makuno ma thahabu maarĩrĩirũo tũbungo twa betha.

¹²Rĩrĩa mũthamaki araikarĩte metha-inĩ yake, maguta makwa me thũngũyũ nĩ gũtararĩka maratararĩkaga o wega.

¹³Mwendwa wakwa-rĩ, harĩ niĩ atariĩ ta karũtũndũ ka manemane, gakomeire nyondo ciakwa gatagatĩ.

¹⁴Mwendwa wakwa harĩ niĩ no ta kamanja ka mahũa ma mũhanuni me mĩgũnda ya mĩthabibu kũu Eni-gedi.

¹⁵Ĩ ndũkĩrĩ mũthaka, mũrata wakwa! anga ndũkĩrĩ mwega o mũno! maitho maku maagĩrĩte ta ma ndutura.

¹⁶Wee, mwendwa wakwa, wĩ mũthaka mũno, ĩĩ-ni, wĩ mwendeku! nakĩo kĩrumia giitũ nĩ nyeki ĩrĩa nduru.

¹⁷Mĩratho ya nyũmba iitũ nĩyo mĩtarakwa, nayo mĩitĩrĩro nĩyo mĩkarakaba.