Song of Solomon 2

¹Niĩ nĩ niĩ ihũa rĩa nyeki-inĩ ta marĩa mameraga Sharoni, ningĩ nĩ niĩ kĩro gĩa itoka rĩrĩa rĩgĩaga ituamba-inĩ.

²Ta kĩro gĩa itoka rĩmerete gatagatĩ ga ciigua, noguo mũrata wakwa atariĩ arĩ airĩtu-inĩ arĩa angĩ.

³Mũtĩ wa macungwa ũmerete gatagatĩ ka mĩtĩ ya gĩthaka, nĩ ta ũguo mwendwa wakwa ahaana arĩ arũme-inĩ arĩa angĩ. Ndaikarire thĩ mwĩgunyĩ-inĩ wake ngenete mũno, na matunda make makĩnjamĩra mũrĩo.

⁴Aandonyirie thingira ũrĩa wa kũrĩĩra iruga, nakĩo kĩbebero gĩake kĩrĩa aahaicĩtie igũrũ rĩakwa nĩ rũendo.

⁵Ta ndeithĩrĩriai na thabibu, mũkĩndiũkie na macungwa, amu ndĩ mũcuce nĩ rũendo.

⁶Guoko gwake kwa ũmotho ta nĩkũngĩe makano, kũrĩa kwa ũrĩo nakuo nĩgũkĩ’hĩmbĩrie.

⁷Inyuĩ andũ-a-nja a Jerusalemu-rĩ, nĩndamwĩhĩtithia na thiya, na mĩgoma ya thwariga cia werũ-inĩ, atĩ mũtikoimbuthũre rũendo, o na kana mũrũarahũre, o nginya rũĩyendere o ruo rũene.

⁸Nĩ mũgambo wa mwendwa wakwa ndaigua! Ĩ nĩ gũũka aroka, okĩte akĩrũũgaga irĩma-inĩ, agoka o agĩtũrũhaga ithũngũri-inĩ.

⁹Mwendwa wakwa atariĩ ta thiya, kana ta thwariga ĩrĩa nyanake: nĩwe ũcio! rĩu nĩarũngiĩ rũthingo-inĩ ruitũ na nja, nĩ kũrorereria ararorereria na ndirica, agakĩng’eteria rũkonjo-inĩ.

¹⁰Mwendwa wakwa nĩ kwaria araaria, akanjĩra atĩrĩ, Mũrata wakwa, thaka yakwa, ũkĩra tũthiĩ!

¹¹Amu-rĩ, hingo nĩ thiru ya gathano, mbura nĩĩhĩtũkĩte ĩgathira:

¹²Nĩ hĩndĩ thĩ ĩrakunũka mahũa; hingo nĩ nginyu ya kũhetũra mĩthabibu, na bũrũri witũ ũkagambaga o ndutura;

¹³Mũkũyũ-rĩ, nĩwĩruhĩtie ngũyũ iria nduru, mĩthabibu nayo nĩĩtumũkĩte kĩro, o na kũhunjia ĩkahunjia mũtararĩko wayo. Mũrata wakwa, thaka yakwa, gĩũkĩre tũthiĩ!

¹⁴Ĩ wee, gatutura gaka gakwa, ũrĩ kũu mĩatũka-inĩ ya rũara, o hau hegitĩtie hurũrũka-inĩ-rĩ, ndũreke nguone ũthiũ! reke njigue mũgambo waku; amu mũgambo waku nĩ mwega mũno, na ũthiũ waku nĩ mũthaka.

¹⁵Tũnyitĩrei mbwe, tũbwe o tũrĩa, tũrĩa-ni tũgũmagia mĩgũnda ya mĩthabibu! thima-rĩ, mĩthabibu iitũ nĩĩtumũrĩte kĩro.

¹⁶Mwendwa nĩ wakwa, na niĩ ndĩ wake: harĩa arĩithagia nĩ mahũa-inĩ.

¹⁷Hũndũka, mwendwa wakwa, tuĩka ta thiya kana ta thwariga nyanake ĩrĩ irĩma-inĩ cia Betheri, hũndũka nginya rĩrĩa kũrĩrura, nacio ciĩruru ciirĩrie.