Job 18

¹HĨNDĨ ĩo Bilidadi ũrĩa Mũshuhi agĩcokia akĩũria atĩrĩ,

²Inyuĩ-rĩ, nĩ hingo ĩigana atĩa mũgũikara mũgĩtegaga mĩtego ya kũgwatia ciugo? ambai mũnyite ũhoro wega, tũcoke na ithuĩ tũkĩarie.

³Tũtuĩtwo ta nyamũ nĩkĩ, tũkonwo nĩ inyuĩ ta tũtuĩkĩte andũ me na gĩko?

⁴Wee ũrehanyũrũra nĩ ũrĩa ũrakaire-rĩ, nĩngarĩ thĩ ĩngĩthamwo nĩ ũndũ waku, kana ndũmba ya ihiga ĩthenge harĩa ĩtũire?

⁵Ũndũ kũrĩ: mũndũ mwaganu-rĩ, ũtheri wake nĩ gũcingimanio ũgacingimanio, o kinya rũrĩrĩmbĩ rũa mwaki wake rũage kũmũrĩka.

⁶Ũtheri ũrĩa ũikaraga hema yake ũgatuĩka o nduma, tawa ũrĩa mũcuurie igũrũ rĩake nĩ kũhora ũkahora.

⁷Mũkinyũkĩrie ũcio wake wa hinya nĩ gũtĩmĩra ũgatĩmĩra, maũndũ marĩa we etaarĩte, nĩmo makamũgũithia thĩ.

⁸Amu magũrũ make mwene no mamũtware wabu-inĩ ndege, arũndwo nĩyo, tondũ harĩa athiagĩra nĩ harĩa hahithanĩtio ndego.

⁹Arĩgwatwo nĩ mũtego ndiira ya kũgũrũ, rũrigi rũa mũgwato rũmũnyitĩrĩrie o wega.

¹⁰Oimbĩkĩirũo kĩana kĩa rũrigi tĩri-inĩ, na akaimbĩrũo irima njĩra.

¹¹Arĩmakagio nĩ matebebia me mbarĩ ciothe, na ateng’eragio nĩmo marĩ o ndiira-inĩ ciake cia magũrũ.

¹²Hinya wake ũrĩikaraga ta ũrĩĩtwo nĩ ng’aragu, naguo mũtino ũrĩkoragwo ũmwĩhaarĩrĩirie o rĩrĩa angĩgitũka.

¹³Ikonde cia mwĩrĩ wake igathũgũnagwo nĩ mũrimũ, ĩĩ-ni, ciĩga ciake igathũgũnagwo nĩ ũrĩa mũrigithathe nĩ gĩkuũ.

¹⁴Nĩ gũkonorũo agakonorũo oimio thĩinĩ wa hema yake ĩo ehokete, atwarũo kũrĩ mũthamaki ũrĩa wa matebebia.

¹⁵Nayo hema yake ĩgatũũrũo nĩ arĩa matarĩ ake: gĩtũũro gĩake nĩgĩgaitĩrĩrio ũbiriti.

¹⁶Mĩri yake nĩ kũũma ĩkomĩra thĩ, na igũrũ, honge ciake ituĩkange.

¹⁷Kũririkanwo gwake no kũriganĩre gũthire thĩ, nĩ kwaga akaaga rĩĩtwa o nginya itũũra-inĩ.

¹⁸Akarutũrũrũo ũtheri-inĩ athiĩ nduma-inĩ, aingatwo gũkũ mabũrũri-inĩ.

¹⁹Ndagakorũo e na mũriũ kana mũcũkũrũwe mũhĩrĩga-inĩ wao, na gũtirĩ mũndũ wake ũgatigara kũu aatũire.

²⁰Andũ arĩa magoka thutha makagegagio nĩ mũthenya ũcio wake, o ta ũrĩa arĩa maarĩ mbere yao maamakirio nĩguo.

²¹Ũguo nĩguo kũhaanaga itũũro-inĩ cia arĩa matarĩ athingu, ha mũndũ ũrĩa ũtoĩ Mũrungu-rĩ, nĩ ũguo gũtariĩ.