Job 19

¹HĨNDĨ ĩo Ayubu agĩcokia akĩũria atĩrĩ,

²Nĩ hingo ĩigana atĩa mũgũikara o mũkĩnjĩkagĩra kĩeha ngoro, na mũkĩ’hehenjaga na ciugo?

³Mũnjukĩte maita o ta ikũmi, na mũtingĩconoka nĩ ũguo mũnyũmĩire nda.

⁴O na ingĩtuĩka atĩ ndirĩ hingo itahĩtĩtie-rĩ, ihĩtia rĩu rĩakwa no niĩ ngũgĩikara narĩo.

⁵Ongorũo no mũkwĩĩ’neneheria, mũkĩngwetagĩra ũmene ũrĩa ’menetwo,

⁶No kĩmenyei atĩ ũhoro wakwa nĩ Ngai ũũinamanĩtie, nĩwe ũndigicĩirie na wabu yake ya kũndega.

⁷Nĩ rĩrĩi, ngayaga ngoiga ndĩ mũhũre, no ndingĩiguwo; ngoiga nĩndeithio, no gũtuĩrũo na kĩhooto ndingĩona.

⁸Nĩ kũhinga a’hingĩire njĩra, ngaremwo nĩ kũhĩtũka, mĩirigo yakwa amĩĩkĩrĩte o nduma.

⁹Riri wakwa nĩ kũnjuma anjumĩte, na akanduta thũmbĩ yakwa mũtwe.

¹⁰Nĩ kũ’momora a’momorete mbarĩ ciothe, ngarindũka: nĩ gũkũũra akũũrĩte kĩĩrĩgĩrĩro gĩakwa ta mũtĩ.

¹¹Anjakanĩirie marakara make ta mwaki, agakĩngeranĩria na arĩa me muku nake.

¹²Ita ciake injerekagĩra irehanĩte o hamwe, na ikenja njĩra ikĩmĩhaicagĩrĩria ya kũnginyĩrĩra, na ikarigicĩria hema yakwa na iraaro ciacio.

¹³Andũ aitũ nĩamathengetie haraya na niĩ, na andũ arĩa tũratũire tũmenyaine meĩndigithĩtie o kwĩĩndigithia.

¹⁴Arĩa a gĩthaku giitũ nĩ kũnjeherera manjehereire, na arata arĩa tũrarĩ thiritũ makariganĩrũo nĩ niĩ.

¹⁵Andũ a gwakwa mũciĩ, nginya ndungata ciakwa cia airĩtu, manduĩte ta mũgeni: monaga ta ndĩ mũrũrĩrĩ.

¹⁶Ndungata yakwa ngamĩĩta ĩkarega gwĩtĩka, no ndĩmĩthaithire na kanua o kũmĩthaitha.

¹⁷Mĩrukĩ ya kanua gakwa nĩ mĩthũũre nĩ mũtumia wakwa, o nacio ciana cia nda ya maitũ ikaigua ta ndĩ mũnungu.

¹⁸’Menetwo nĩ kinya tũhĩĩ tũrĩa tũnini; rĩrĩa ngũũkĩra, tuo nĩ kũnyũrũria tũ’nyũrũragia.

¹⁹Arata arĩa a ngoro yakwa othe nĩma’thũũrĩte, andũ o arĩa ndĩrendete nĩo mangarũkĩte.

²⁰Mahĩndĩ makwa nĩmagwatanĩte na rũũa o na nyama; ’honokete na kĩni kĩa magego o giiki.

²¹Mũtikĩnjiguĩre tha, mũtikĩnjiguĩre tha, inyuĩ arata akwa! amu nĩ guoko kwa Ngai kũ’hutĩtie.

²²Mũthingatanĩte na niĩ nĩkĩ ta arĩ inyuĩ Mũrungu, na mũkandĩaga nyama cia mwĩrĩ mũtekũiganwo?

²³Na arĩ korũo ciugo ciakwa nĩ kwandĩkwo ikĩandĩkĩtwo! korũo nĩ gũtemwo itemetwo thĩinĩ wa ibuku!

²⁴Na arĩ korũo icanĩtwo na karamu ga kĩgera na igekĩrũo ngocorai, nĩguo itũũre ii njane ndũmba-inĩ ya ihiga kinya tene!

²⁵No ningĩ nĩnjũĩ atĩrĩ, atĩ Mũngũũri arĩ o kuo, e muoyo, na atĩ marigĩrĩrio-inĩ nĩwe ũkarũgama tĩri-inĩ ũyũ;

²⁶Na ikonde ici ciakwa ciakĩrĩkia kwĩha, na mwĩrĩ wakwa ũyũ wa nyama wagĩkorũo ndũrĩ ho, hĩndĩ ĩo nĩngona Ngai;

²⁷Nĩ kwĩonera ngamwĩonera arĩ wa mwena wakwa, maitho makwa nĩmo makamwĩrorera, na ti ta e mũgeni. Ngoro yakwa ĩgũkĩringĩka thĩinĩ wakwa!

²⁸Akorũo inyuĩ muugĩte atĩrĩ, Nĩtũgũthingatana nake ma! nĩ ũndũ, atĩ, gatũũrũ ka ũhoro ũyũ karĩ o thĩinĩ wakwa-rĩ,

²⁹Tuĩkai a gwĩtigĩra njomo! amu mĩherithanĩrie ya rũhiũ nĩ ya marũrũ, mũmenye no kũrĩhanagĩrio.