Job 20

¹HĨNDĨ ĩo Zofaru ũrĩa Mũnaamathi agĩcokia akiuga atĩrĩ,

²Tondũ wa ũhoro ũcio-rĩ, meciria makwa nĩmaanjĩra njokie, tondũ wa kũhiũhahiũha kũrĩa ngoro yakwa ĩĩ nakuo.

³Ndĩ kũigua mũcirĩre wanjonorithia, no roho wakwa ũrĩa wĩ mbuguĩro nĩũra’he macokio.

⁴Githĩ ndũũĩ ũhoro ũyũ, ũrĩa ũtũire kuuma o tene, gwata o rĩrĩa kwaambire kũigwo mũndũ gũkũ thĩ,

⁵Atĩ kũrũhia kwa andũ arĩa aaganu nĩ kwa hingo nguhĩ, gũkena kwa mũndũ gĩthagathago-rĩ, no gwa kaninda kanini?

⁶O na mwĩtũũgĩrio wake wakorũo ũhaicĩrĩire o kinya igũrũ, kĩongo gĩake gĩgagĩkinya o matu-inĩ-rĩ,

⁷Ndarĩ hingo atarĩtoma nginya tene o ta mai make mwene: arĩa maramuonaga nĩ kũũria makoragia, Kaĩ aagĩire kũ?

⁸Kũirĩra arĩirĩra ta kĩroto na ndacoke kuoneka: ĩĩ-ni, arĩingatwo ore, o ta kĩoneki gĩa ũtukũ.

⁹Riitho rĩrĩa rĩramuonaga rĩtigacoka kũmuona rĩngĩ, o na handũ harĩa aikaraga hatigacoka kũmwĩrorera.

¹⁰Ciana ciake igatuĩka cia kwĩendereria harĩ andũ arĩa ahũthũ; moko make mwene magacokia indo ciake na kũrĩa aacirutire.

¹¹Mahĩndĩ make rĩu nĩmaiyũire hinya wa wĩthĩ wake, no ndũrĩ hingo ũtarĩkoma hamwe nake rũkũngũ-inĩ.

¹²O na gwatuĩka atĩ ũũru wĩ mũrĩo wĩ kanua gake, na akauumbĩka ruungu rũa rũrĩmĩ,

¹³Ningĩ o na gwatuĩka nĩaũiguagĩra tha, akarega kũũrekia, agakĩũikaria thĩinĩ wa kanua-rĩ,

¹⁴Irio icio ciake nĩ kũgarũrũka imũgarũrũkaga ii thĩinĩ wa nda, thĩinĩ wake igagĩtuĩka o nyongo ya nduĩra.

¹⁵Kũmeria nĩameretie ũtonga, na no nginya acoke kũũtahĩka; Mũrungu nĩ kũhurũra arĩũhurũra kũu thĩinĩ wa nda yake.

¹⁶Nĩ ũrũrũ wa nduĩra ongete, na nĩ rũrĩmĩ rũa nyamũ-ya-thĩ rũgakĩmũũraga.

¹⁷We ndakerorera mĩtaro ĩrĩa, kana njũĩ iria igũikũrũkia ũũkĩ na ngorono.

¹⁸Kĩrĩa arĩmĩte o na thĩna nĩ gũcokia agagĩcokia, tiwe ũkameria; ũguo uumithio wake ũigana, tiguo arĩkenaga nĩguo.

¹⁹Nĩ gũkorũo aanahinyĩrĩria andũ arĩa ahũthũ agacoka akamatiganĩria; gũtunya aanatunyana nyũmba na hinya atarĩ we wamĩakire.

²⁰Tondũ nda yake ndĩarĩ hĩndĩ ĩngĩmũhurũkia, ndarĩ kĩndũ akahonokia, icio eriragĩria.

²¹Ndarĩ kĩndũ aatigaririe atarĩĩte; tondũ ũcio wega ũcio onaga o naguo ndũgatũũra.

²²Hĩndĩ ĩrĩa aiganĩtie indo o kũigania nĩrĩo agatonya hatĩka-inĩ; nĩ gũkinyĩrĩrũo agakinyĩrĩrũo nĩ moko ma arĩa othe a kĩnyamaro.

²³Nĩguo nda yake ihũne-rĩ, Ngai akarekia marakara make marĩa maakanu mamũgũĩre, amuurĩrie maingĩ o ta mbura, matuĩke mo irio ciake.

²⁴Akorĩra itimũ rĩa kĩgera, arathwo na ũta wa rũthuku, ahunguranio.

²⁵Akarika gwĩcomora mũguĩ, naguo ũtuĩke ũkũmuuma o mwĩrĩ; ĩĩ-ni, mũguĩ ũcio mũkengu ũkoima o nyongo yake thĩinĩ; nake agwatwo nĩ matebeba.

²⁶Nduma yothe nĩyo aigĩirũo ĩtuĩke mũthithũ wake: mwaki ũtarĩ mũndũ ũhuhĩrĩirie nĩguo ũkamũrambia, na uninũkie o na kĩrĩa gĩtigĩtwo hema yake.

²⁷Igũrũ matu-inĩ nĩgũkaguũranĩria waganu wake, o nayo thĩ kũmũũkĩrĩra ĩmũũkĩrĩre.

²⁸Wongerereku wa indo cia gwake nĩ kwehuta ũkamwehutĩra, indo icio ithiĩ na kĩguũ mũthĩ ũcio wa marakara ma Ngai.

²⁹Rũu nĩruo rũatũ rũrĩa mũndũ mwaganu aatũragĩrũo nĩ Ngai, nĩrĩo igai rĩrĩa aathĩrĩirũo nĩ Mũrungu.