Job 27

¹NAKE Ayubu agĩcoka agĩtwara thimo ciake na mbere, akiuga atĩrĩ,

²Na tondũ Mũrungu e muoyo-rĩ, o we ũteete kĩhooto gĩakwa, o ũcio Mwene-Hinya-rĩ, ũrĩa wĩkĩrĩte ngoro yakwa ũcũngũ,

³(Amu muoyo wakwa o na rĩu no ũnjiyũire, no roho wa Ngai ndĩ o naguo maniũrũ-inĩ makwa,)

⁴Nĩ ma, mĩromo yakwa ndĩkwaria cia wogogi, kana rũrĩmĩ rũakwa rũkoiga cia ũhinga.

⁵Kũrogira ingĩĩtĩkia atĩ nĩ inyuĩ mwĩ na kĩhooto: nginya ngakua ndigetĩkĩra gũkaana wĩkindĩru wa ngoro yakwa ũ’thengere.

⁶Ũthingu wakwa no ndĩũrũmĩtie, na ndingĩũrũmũkia: ngoro yakwa ndĩgũcuka matukũ makwa o na ũrĩkũ.

⁷Thũ yakwa ĩroona ta ũrĩa mũndũ mwaganu onaga, mũnjũkĩrĩri-rĩ, arokĩona ta ũguo kuonagwo nĩ ũrĩa muogogi!

⁸Tondũ-rĩ, ũrĩa gĩthagathago, kĩĩrĩgĩrĩro gĩake kĩngĩgĩtuĩka kĩ, Ngai aamũng’ũria, rĩrĩa-ni aamũcokera muoyo wake?

⁹Mũrungu e hingo angĩkĩigua ikaya rĩake rĩrĩa mĩnyamaro ĩmũkinyĩrĩire?

¹⁰Nĩngarĩ ũcio arĩ wa gwĩkenagĩra nĩ ũndũ wa Mwene-Hinya, akayagĩre Ngai mahinda mothe?

¹¹Inyuĩ-rĩ, nĩngũmuonia mwĩkĩre wa guoko kwa Mũrungu; maũndũ ma Mwene-Hinya niĩ ndikũmahitha.

¹²Inyuĩ inyuothe githĩ mũtimeoneire? nĩ kĩ gĩgĩtũmĩte mũtuĩke andũ a tũhũ o biũ?

¹³Rũrũ-rĩ, nĩruo rũgai rũa mũndũ ũrĩa mwaganu harĩ Mũrungu, nĩrĩo igai rĩa arĩa anyarirani, rĩrĩa magwataga harĩ Mwene-Hinya.

¹⁴Ciana ciake ingĩingĩha, nĩ njomo ciingĩhĩire, na rũciaro rũake rũtingĩhũnaga irio.

¹⁵Ndigwa ciake igathikwo na mũthiro, na atumia a gwake arĩa akuĩre nĩ arũme gũtirĩ kĩgirĩko makagĩa nakĩo.

¹⁶O na angĩonganĩrĩria betha ĩigana ta rũkũngũ, na nguo atumithie ciigana o ta gataka,

¹⁷Gũtumithia nĩegũtumithia, no nĩ arĩa athingu magaciĩhumba, nayo betha ĩo, arĩa matarĩ ehia nĩo makamĩgayana.

¹⁸Nyũmba ĩo eakĩire no ta ya mbũmbũĩ, kana ta rũtara rũrĩa rũakagwo nĩ mũriri.

¹⁹Egũkoma e mũtongu, no gũcokera ndagacokera; aaracũria maitho, agakora ndarĩ ho.

²⁰Akinyagĩrĩrũo nĩ matebebia ta arĩ maĩ ma kĩguũ; ahuragio ũtukũ nĩ kĩhuhũkanio agatwarũo.

²¹Rũhuho rũrĩa ruumaga na irathĩro rũmũũmbũraga agathiĩ naruo, rũmũhaatũrũragia rũkamũthengia harĩa atũũraga.

²²Nĩ gũkorũo Ngai arĩmũhũraga na ngurukuhĩ atekũmũiguĩra tha: nĩ kwenda arĩendaga o kũũra ehere guoko-inĩ gwake.

²³Andũ marĩmũhũragĩra hĩ nĩ kũmũkenerera, na mamũringagĩre mĩnjũri akĩingatwo hau atũũraga.