Job 28

¹MŨTHIMA wa betha nĩkũrĩ, na kũrĩ o handũ ha gũthereria thahabu.

²Kĩgera nĩkĩrutagwo mũthanga-inĩ, na kĩgera kĩa rũthuku kĩrutagwo mahiga-inĩ nĩ gũtwekio.

³Andũ nĩmakinyagia nduma o gĩturi-inĩ kĩayo magĩtuĩragia mahiga kinya o mũhaka ũrĩa wa kũrigĩrĩria, magagĩkinyĩrĩra marĩa me nduma-inĩ ĩrĩa nene, o kũu kwĩ nduma ta ya gĩkuũ.

⁴Matũrĩkagia irima thĩ makaya gũtigana na kũrĩa andũ matũũraga, magakĩriganĩra makinya ma arĩa mahĩtũkagĩra ho; magacuhaga kuo makĩereraga marĩ o kũu kũraihanĩrĩirie na kĩrĩndĩ.

⁵Thĩ igũrũ-rĩ, nĩkuo kuumaga irio, na kũrĩa thĩinĩ nĩ kũhukũranio ĩhukũranagio ĩgaikara ta yomoretwo nĩ mwaki.

⁶Mahiga-inĩ mayo nĩkuo kwĩ na yakuti iria ihaana bururu, o na nĩkuo kwĩ mũthanga wa thahabu.

⁷Njĩra ĩo-rĩ, gũtirĩ nderi ĩmĩũĩ, na ndĩrĩ yonwo nĩ riitho rĩa hũngũ.

⁸Nyamũ iria ii na ngũrũ gũtirĩ ĩrĩ yamĩkinya, mũrũthi, na ũrĩ ũrũme, gũtirĩ ũrĩ wamĩthiĩra.

⁹Andũ matambararagia moko makanyita rũaro o rũrĩa rũũmũ mũno; o gwata irĩma nĩ gũturũra maciturũraga o na mĩri.

¹⁰Matũraga mĩirigo o thĩinĩ wa rũhiga, na kĩndũ kĩrĩa kĩĩ bata gũtirĩ gĩtonagwo nĩ maitho mao.

¹¹Mathingaga mĩnyũrũrũ ya maĩ ĩgatiga gũtherera; kĩndũ kĩrĩa gĩtũire gĩĩ kĩhitharu magakiumĩria ũtheri-inĩ.

¹²No ũũgĩ-rĩ, ũngĩkĩoneka kũ? ũtaũku-rĩ, gĩtũũro kĩaguo nĩ ha?

¹³Gũtirĩ mũndũ ũũĩ ũrĩa ũngĩgũrũo; kuoneka ndũngĩoneka bũrũri wa arĩa me muoyo.

¹⁴Kũrĩa kũriku mũno gũkuuga atĩrĩ, Ndũrĩ thĩinĩ wakwa; narĩo iria rĩrĩa inene rĩkoiga, Ndũrĩ gũkũ gwakwa.

¹⁵Ndũngĩgũrĩka na thahabu, na thogora waguo ti wa kũgererũo betha.

¹⁶Ndũngĩhota kũringanio na thahabu ya Ofiri, kana onigithi ĩrĩa ĩĩ goro, kana o yakuti.

¹⁷Thahabu kana icicio-rĩ, itingĩhota kũigananio naguo, na ndũngĩhota gũkũũranio na indo cia thahabu, o na ĩrĩa ngembu.

¹⁸Maricani kana ngenyekenyi iria cia goro itingĩgwetanio naguo o na hanini: thogora wa ũũgĩ-rĩ, ũkĩrĩte wa ruru iria ndune.

¹⁹Yakuti ĩhaana ngoikoni, ĩrĩa yumaga Kushi, ndĩngĩigananĩka naguo, na ndũngĩringanĩka na thahabu o na ĩrĩa theru mũno.

²⁰Hakĩrĩ ũguo-rĩ, ũũgĩ ũngĩkiuma kũ? ũtaũku-rĩ, gĩtũũro kĩaguo nĩ ha?

²¹Amu nĩ kũhithwo ũtũire ũhithĩtwo maitho ma arĩa othe me muoyo, o kinya ũkagitanio nyamũ cia rĩera-inĩ itikawone.

²²Ininanĩro-inĩ o nakĩo Gĩkuũ, ikuuga atĩrĩ, Ithuĩ matũ maitũ no ngumo yaguo twanaigua.

²³Ngai-rĩ, nĩwe ũkũũraine njĩra ya kwaguo, nowe ũũĩ harĩa ũtũũraga.

²⁴Amu we nĩaikagia maitho o kinya ituri cia thĩ, na gũtirĩ handũ atonaga ruungu ruothe rũa igũrũ.

²⁵Rĩrĩa aathimĩire rũhuho nditi yaruo, o namo maĩ akĩmagera na kĩgeri;

²⁶Hĩndĩ ĩrĩa aatuĩrĩire mbura watho wa kũmĩathaga, na agĩtemera rũheni rũa marurumĩ njĩra yaruo-rĩ,

²⁷Nĩrĩo aawonire, na akĩuumbũra, agĩkĩũrũmia, o na gũthuuthuuria akĩũthuuthuuria.

²⁸Nao andũ akĩmera atĩrĩ, Onei, gwĩtigĩra Mwathani-rĩ, nĩkuo kũũhĩga-kũrĩa-kwa-ma; gũthemaga ũũru-rĩ, nĩkuo gũtaũka.