Job 29

¹NAKE Ayubu agĩcoka agĩtwara thimo ciake na mbere, akiuga atĩrĩ,

²Na arĩ korũo ndariĩ ta ũrĩa ndahaanaga mĩeri ĩrĩa ya tene, o ũrĩa ndatariĩ matukũ marĩa Ngai aa’menyagĩrĩra;

³Rĩrĩa tawa wake wamũrĩkaga igũrũ rĩa mũtwe wakwa, ngakĩhunguragĩra nduma-inĩ nĩ ũndũ wa ũtheri wake!

⁴Korũo ndariĩ ta ũrĩa ndahaanaga rĩrĩa matukũ makwa maarĩ makũgũku, rĩrĩa-ni ndundu ya Ngai yaikaire ĩhumbĩire hema yakwa;

⁵Mwene-Hinya ataanatiga gũikarania na niĩ, na ciana ciakwa no ciandigicĩirie;

⁶O rĩo rĩrĩa makinya makwa maathiaga magĩthambagio nĩ iria imata, naruo rũaro rũa ihiga rũga’therũkagĩra njũĩ cia maguta!

⁷Hĩndĩ ĩo ndoima na gwakwa ngathiĩ kĩhingo-inĩ gĩa itũũra, ndaiga gĩtĩ gĩakwa hau kĩaraho-inĩ-rĩ,

⁸Aanake makanyona, magoka o magethengera, athuri nao magokĩra magakĩrũgama;

⁹Athamaki nĩmaatigaga kwaria, magakĩĩhumba tũnua na hĩ;

¹⁰Mĩgambo ya atongoria ĩgakira, nĩmĩ ciao ikagwatana na karakara.

¹¹Nĩ amu gũtũ rĩrĩa kwaigua ũhoro wakwa no kũndathima kwandathimaga, narĩo riitho rĩrĩa rĩanyona rĩkaheana ũira wakwa:

¹²Nĩ ũndũ mũndũ mũthĩni aakaya nĩndamũhatũraga, o nake ũrĩa ũtarĩ ithe, ũrĩa wagĩte mũmũteithia.

¹³Ndagũagĩrũo nĩ kĩrathimo kĩa ũrĩa wakiriĩ gũthira, nayo ngoro ya mũtumia wa ndigwa ngatũma ĩkũngũiye nĩ gũkena.

¹⁴Nĩ ũthingu ndeguĩkĩte, naguo ũkeĩ’humba, ũciri wakwa wa kĩhooto ũgakĩnjikaraga ta nguo ya igũrũ, o na ta kĩremba ndĩ nakĩo mũtwe.

¹⁵Nĩ niĩ ndarĩ maitho ma ũrĩa mũtumumu, na nĩ niĩ ndarĩ magũrũ ma ũrĩa gĩthua.

¹⁶Ũrĩa mũkĩaru-rĩ, ndatuĩkaga ta ithe, na nĩndoiruragia cira wa mũndũ itoĩ.

¹⁷Mũndũ ũrĩa muogogani, nĩndamuunaga ngambucu, ngĩrũmũkithagia ndĩa ĩrĩa arũmĩtie na magego make.

¹⁸Hingo ĩo ndeĩraga atĩrĩ, Ngakuĩra o kĩmamo-inĩ gĩakwa, matukũ makwa ngamakĩrĩrĩria maigane ta mũthanga;

¹⁹Mũri wakwa ũtambĩte ũgakinya o maĩ-inĩ, namo mathũmbĩ makwa maraaraga marĩ o na ireera,

²⁰Riri wakwa ũtũũraga ũrĩ o mwanakahu, naguo ũta wakwa ũkerũhagio ũrĩ o guoko gwakwa.

²¹Niĩ-rĩ, andũ nĩmaandegagĩra matũ, na mageterera, magakira ki, rĩrĩa ngũheana kĩrĩra.

²²Ndanina ũhoro wakwa, o matiagĩcokaga kwaria; ciugo ciakwa ciamataatagĩra ta mataata.

²³Magakĩnjeterera o ta ũrĩa gũtanyagwo mbura, magaathamagia tũnua ta ũrĩa kũnyotagĩrũo mbura ĩrĩa ya kũrigĩrĩria.

²⁴Rĩrĩa maakorũo morĩtwo nĩ mwĩhinyo, nĩ niĩ ndamathekathekagia, nao ũtheri wa gĩthiithi gĩakwa matingĩtũma ũiname.

²⁵Nĩ niĩ ndamathuragĩra njĩra, ngaikara ta ndĩ mũnene wao, ngatũũra ndĩ ta mũthamaki wĩ gatagatĩ ga ita ciake, ngatuĩka ningĩ ta mũthathayani ũgũthathaya arĩa maracakaya.