Job 31

¹Niĩ nĩtwarĩkanĩire na maitho makwa: ingĩkĩhota atĩa gũcoka kwĩrorera mũirĩtu?

²Amu-rĩ, rũgai nĩ rũrĩkũ rũrĩa ingĩtũmĩrũo nĩ Ngai ũrĩ igũrũ? igai nĩ rĩrĩkũ rĩrĩa ingĩkagwata ndũmĩirũo nĩ Mwene-Hinya ũrĩ matu-inĩ?

³Githĩ arĩa matarĩ athingu ti mũtino matũmagĩrũo, arĩa eki maũndũ maaganu-rĩ, rũgai rũao anga ti ndirũ?

⁴Githĩ we ndonaga ikĩro ciakwa, na makinya makwa mothe akamatara?

⁵Korũo ndanacangania na ũndũ ũrĩa ũtarĩ wa ma, na kũgũrũ gwakwa gũkĩhiũha gũthiĩ gwĩka ũndũ wa ũhinga-rĩ,

⁶(Gũthimwo nĩngĩthimwo na ratiri ĩrĩa njigananu wega, nĩguo Ngai amenye wĩkindĩru wakwa;)

⁷Korũo ikinya rĩakwa rĩanehũka rĩkiuma njĩra-inĩ, ngoro yakwa ĩgagĩthiĩ kũrũmĩrĩra maitho-rĩ, na korũo gwĩ kĩmeni o na kĩnyinyi kĩanangwata moko:

⁸Hĩndĩ ĩo-rĩ, kũrotuĩka atĩ ndahanda, nĩ mũndũ ũngĩ ũrĩrĩaga; ĩĩ-ni, mĩhando ya mũgũnda wakwa ĩroombororio ĩthire!

⁹Kũngĩkorũo ngoro yakwa yanahenererio nĩ mũndũ mũka, ngagĩikaraga ngĩcemagĩrĩra mũromo-inĩ wa kwa mũndũ ũngĩ wa itũũra-rĩ,

¹⁰Hĩndĩ ĩo mũtumia wakwa arothĩagĩra mũndũ ũngĩ, na andũ angĩ, tiga niĩ, makĩmũraaragĩre!

¹¹Tondũ ũcio watuĩka ũmaramari ũrĩa mũnene; ĩĩ-ni, watuĩka waganu ũrĩa ũngĩherithanĩrio nĩ kĩama.

¹²Amu ũcio nĩ mwaki ũrambanagia o kinya Ininanĩro-inĩ, na nĩ kuombororia ũngĩombororia uumithio wakwa wothe.

¹³Korũo kwĩ hingo ndarurũkire cira wa ndungata yakwa, o ya mũndũ mũrũme kana mũirĩtu, rĩrĩa ciagariũranaga na niĩ:

¹⁴Ingĩgĩĩka atĩa Mũrungu aarahũka? ingĩkĩmũcokeria ũhoro ũrĩkũ aandokera?

¹⁵Ũrĩa niĩ wanyũmbire ihu-inĩ towe wombire ũcio ũngĩ o nake? to ũmwe wagĩtũthondekire twĩ nda?

¹⁶Korũo ndanagiria arĩa ahũthũ magĩe na kĩrĩa mendaga, kana maitho ma mũtumia wa ndigwa ngĩtũma mamicamice;

¹⁷Na korũo ndanerĩĩra tũirio twakwa ndĩ nyiki, na ciana cia ngoriai itirĩe kĩndũ ho;

¹⁸(Na tiguo; amu kuuma ũnyinyi wakwa mwana ta ũcio akũrĩire harĩ niĩ ta arĩ niĩ ithe, na mũtumia ta ũcio ndũire ndĩ mũtongoria wake kinya ndoima nda ya maitũ;)

¹⁹Korũo ndanakĩona mũndũ agĩkua nĩ ũndũ wa kwaga nguo, kana ngĩona ũrĩa mũkĩa aagĩte gĩa kwĩhumba-rĩ;

²⁰Korũo thũnũ ciake itianandathima, korũo ndakĩigana kũiguithio ũrugari wa guoya wa ng’ondu ciakwa-rĩ;

²¹Korũo ndanakĩoera arĩa matarĩ maithe guoko ndĩmahũre, nĩ ũndũ nĩndonaga a kũndeithia kwagĩa cira thome-inĩ-rĩ:

²²Hĩndĩ ĩo kĩande gĩakwa kĩroteithũkana na mũrĩnga, nakuo guoko gũtuĩkĩre o gĩtina!

²³Amu nĩndetigagĩra mũno mũtino ũrĩa ũngiuma kwĩ Mũrungu, na tondũ wa ũtũũgĩru wake ndirĩ ũndũ ingĩahotire gwĩka.

²⁴Ingĩkorũo kwĩ hĩndĩ ndanatua atĩ thahabu nĩyo kĩĩrĩgĩrĩro gĩakwa, ngĩkĩĩra thahabu ĩrĩa theru, Nĩwe mwĩhoko wakwa-rĩ;

²⁵Korũo nĩndakenaga nĩ ũndũ ũtonga wakwa warĩ mũnene, na tondũ guoko gwakwa kwarĩ kũgwatu indo nyingĩ-rĩ;

²⁶Korũo ndĩ hĩndĩ ndakĩonire riũa rĩkĩara kana ngĩona mweri ũgĩceera na ũcangararu waguo,

²⁷Na ngoro yakwa ĩkĩhenererio na hitho, guoko ngĩkũmumunya na kanua-rĩ:

²⁸Ũguo naguo watuĩka waganu ũrĩa ũngĩherithanĩrio nĩ kĩama, tondũ nĩ gũkaana ingĩakaanire Mũrungu ũrĩa wĩ igũrũ.

²⁹Korũo ndĩ hĩndĩ ndakenire nĩ ũndũ wa iharagana rĩa ũrĩa ũ’thũire, kana rĩrĩa ũũru wamũkorire ngĩgĩĩtũũgĩria;

³⁰(Niĩ-rĩ, o na ndingĩetĩkĩririe kanua gakwa kahĩtie nĩ kũmũgeka, atĩ kahoe oimwo nĩ muoyo;)

³¹Korũo andũ a hema yakwa matioigaga atĩrĩ, Nũ ũngĩona ũmwe ũtahũnaga nyama ciake?

³²Niĩ gwakwa-rĩ, mũndũ mũgeni ndarĩ aaraara nja; mũgendi, niĩ no gũtiirũria ndamũtiirũragĩria;

³³Niĩ, korũo ndanarindĩrĩra mehia makwa ta mũtugo wa andũ, ngakĩhitha waganu wakwa o thĩinĩ wa gĩthũri gĩakwa,

³⁴Nĩ ũndũ atĩ nĩndetigĩrĩte kĩrĩndĩ, na ngaguoyithio nĩ rũmena rũa mĩhĩrĩga, ngagĩĩkirĩra, na ndiume nja.

³⁵Ĩ na arĩ korũo ndĩ na wa kũnjigua! (Onei, rũũri rũakwa nĩ rũrũ, Mwene-Hinya nĩakĩnjokerie ũhoro!) Ningĩ na arĩ korũo ndĩ na marũa ma thitako marĩa mũmuku wakwa aandĩkĩte!

³⁶Ndirĩ hĩndĩ itangĩmakuua ndĩmaigĩrĩire o kĩande; nĩ kwĩoha ingĩmeoha ta kĩremba.

³⁷Makinya makwa mothe ndamwĩra mũigana wamo; nĩ gũthengerera ingĩmũthengerera ta ndĩ mũnene.

³⁸Kũngĩkorũo ng’ũndũ yakwa nĩĩra’thitaka, ĩka’negenera, mĩkururo ya mũraũ ĩkĩrĩraga maithori o hamwe;

³⁹Korũo ndũire ndĩaga maciaro mayo itaamĩrutĩire mbia, kana ngĩtũma ene yo moimwo nĩ muoyo-rĩ:

⁴⁰Hĩndĩ ĩo, ithenya rĩa ngano kũromeraga ciigua, na handũ ha cairi kũmerage o mahuti! Ndeto cia Ayubu nĩciathira.